Patay na nga nidangat sa Badian District hospital ang usa ka trisikad driver human ma-hit and run sa usa ka puti nga Toyota Fortuner sa Barangay Poblacion, lungsod sa Alcantara, habagatan sa Sugbo, alas 8:15 sa gabii sa Martes, Mayo 23, 2023.
Ang biktima giila nga si Jerry Sambilad Timtim, 53, taga Barangay Salagmaya, Alcantara.
Sa imbestigasyon sa traffic investigator sa Alcantara Police Station nga ang Toyota Fortuner kusog nga nagdagan gikan sa lungsod sa Moalboal paingon sa dakbayan sa Sugbo apan iyang nasaghiran ang nagbisikleta sa taytayan sa Barangay Polo nga si Alfredo Cultura Sabanal, 70, nga niresulta sa pagka angol niini.
Apan ang drayber sa SUV wala mohunong ug padayon sa kusog nga pagpadagan.
Pag-abot sa Barangay Poblacion nakaigo na usab kini og traysikad nga gimaneho ni Timtim.
Dali nga gidala ang biktima sa Badian District Hospital apan nakabsan sa kinabuhi.
Ang kapulisan sa Alcantara nagpadayon sa ilang follow up investigation pinaagi sa pagsusi sa mga CCTV camera sa mga silingang lungsod aron pag-ila sa naka-hit and run sa mga biktima.