Dili na kolektahon sa Kagamhanan sa lungsod sa Tuburan ang gipundo nga mga basura kon dili kini bahigon sa mga residente.
Gipahibawo sa kagamhanan sa lungsod nga sugod sa Agusto 1, 2023, hugtanon nilang ipatuman ang “no segregation, no collection” policy.
Pasabot nga kolektahon lang sa garbage trucks ang gibahig nga mga basura niadtong malata ug dili malata.
Kini tungod kay magsugod na og operate ang makina sa lungsod nga maoy moproseso aron ma-recycle ang mga basura. Paagi kini sa kagamhanan nga mamenosan usab ang kahugaw ug sa ingon mas makatabang usab kini pag preserbar sa kalikupan.
Sugod sa sunod buwan, kuhaon na sa mga municipal garbage collector ang mga basura nga malata sa buntag samtang ang mga basura nga dili malata hakuton sa hapon.
Nanghinaot ang kagamhanan sa suporta ug pagtuman sa mga residente sa maong lagda alang sa mas limpyo ug mas hapsay nga palibot.
“Atong suportahan ug sugdan sa atong tagsa-tagsa ka panimalay, aron palibot nato limpyo ug puy-an nga haruhay. Kay sa Tuburan, walay hugawan,” matod sa LGU. (ANV)