Padayon gihapon ang gihimo nga search and rescue (SAR) operation sa Philippine Coast Guard District - Central Visayas human na-missing ang usa ka tripolante sa tugboat nga nalunod samtang nagguroy sa usa ka barko kay nabangga kini sa iyang giguroy niadtong Biyernes, Marso 10, sa Colorado shipyard, lungsod sa Consolacion, amihanang Sugbo.
Ang missing giila sa PCG 7 nga si Joseph Villamor, tripolante sa MTUG Nagasaka nga maoy nagguroy sa LCT Jana Juliana.
Nasayran nga samtang giguroy sa tugboat ang maong barko, miigo ang bow kun dulong sa tugboat ngadto sa barko hinungdan pagkalunod niini mga 183 metros gikan sa habagatang bahin sa Colorado shipyard.
Matod sa update sa tigpamaba sa PCG 7, Lt. Junior Grade Stephen Pagcaliwagan sa Sabado, Marso 11, nga wala pa makit-i si Villamor nga maoy unang nilayat dihang nalunod ang tugboat.
Unang nadawat sa PCG 7 ang impormasyon kabahin sa insidente sa alas 3:00 sa hapon niadtong Biyernes.
Dali sila nga nipadala sa ilahang barko nga MRRV-4408 lakip ang duha ka ship diver aron mohimo sa surface ug underwater SAR.
Dugang ni Pagcaliwagan nga walay nakita nga sinyales sa oil spill bisan og nagdala ang tugboat og kapin 60 ka litros sa diesel oil base na usab sa pakisusi sa Coast Guard Sub-Station Mandaue ug Marine Environmental Protection Unit - Central Visayas.
Girekomendar usab sa PCG 7 nga mosang-at og marine protests ang duha ka mga barko mahitungod sa panghitabo.