Tugboat nga nalunod sa Consolacion palutawon

NAGPLANO ang tag-iya sa tugboat nga palutawon kini gikan sa nalunoran sa kadagatan sa Barangay Tayud, Consolacion, Cebu aron makuha ang tulo ka mga tripolante nga nauban pagkaunlod niini.

Ang tugboat nalunod atol sa pagkuso-kuso sa Bagyong Odette (Rai) sa Huwebes, Disyembre 16, 2021 sa gabii.

Si Kapitan Alvin Dagalea, commander sa Philippine Coast Guard (PCG) Cebu, niingon nga niadtong Huwebes, Disyembre 30 ang tag-iya sa mv Ida nagplano nga mo-hire og pribadong kompaniya nga maoy mopahigayon sa salvage operation, usa ka proseso sa pag-recover sa usa ka barko ug sa mga karga niini.

Matod ni Dagalea atol sa iyang pakighinabi sa tag-iya niadtong Disyembre 28, ang naulahi mangita og accredited nga salvor, usa ka tawo o kompaniya nga nagnegosyo sa salvaging sa mga barko.

Ang pagsalbar sa mv Ida maglakip sa pagbira sa barko gikan sa ilawom sa dagat ug posibleng pagpalutaw niini.

Tulo sa unom ka tripulante sa mv Ida ang nakuha gikan sa tugboat. Sila si Kapitan Luisito Roble, chief engineer Arthur Saavedra ug crew member nga si Roniel Fernandez.

Ang tulo nga nahabilin nga mga tripulante natanggong sa pilot house sa tugboat, ang kwarto diin magtimon sa tugboat, sulod na sa 14 ka adlaw.