TULO ang naangol sa nahitabo nga vehicular accident diha sa may Cebu South Coastal Road (CSCR) sa unahan sa Talisay City Fish Port, habig sa Barangay Tangke, sa maong dakbayan.
Kini human nga usa ka multicab nga kolorum.nga namasahero ang nadumbulan sa van nga nagsunod niini, alas 7:30 Martes sa buntag, Nov. 19, 2019.
Matud ni Jonathan Tumulak, ang pangulo sa City of Talisay Traffic Operations Development Authority (CT-TODA), nga ang duha ka sakyanan ang parehong nagsubay og susama nga lane gikan sa dakbayan sa Sugbo, padung sa dakbayan sa Talisay.
Ang multicab ang gimaneho ni Virgilio Zambrano Jr., 58 anyos, molupyo sa Barangay Bulacao, dakbayan sa Sugbo.
Diin niangkon matud pa si Zambrano nga nang-pick up kini og pasahero sa Plaza Independencia sa dakbayan sa Sugbo ug paghatud niini sa Talisay.
Giangkon usab niini nga colorum kini kon walay prangkisa sa pagpamasahero.
Aduna kini napulo ka mga pasahero, usa niini sa pag-aboy sa lugar nga nadisgrasyaan ang giingong nipara aron sa pagkanaug.
Giingon nga nihunong ang multicab ug kalit na lang nga nibangga ang van nga gimaneho ni Edgar Martinez Alic, 26 anyos, residente sa Lawaan I, sa dakbayan sa Talisay.
Tungod sa impact, ang tulo sa 10 ka mga sakay sa multicab ang naangol.
Giila sila nga si Brian Ariola Red, 35 anyos, Ayline Tagalog, 43 anyos ug Teddy Dela Cerna, 50 anyos.
"Pareho going to south, ang mga involve, usa ka multicab nga kolurom ug usa ka private nga van, niangkon ang driver nga gikan siya nang pick up og pasahero, while nagdagan siya, dihay nituktok, ni-menor siya sa iyang pagpadagan pero nagsunod niya, kusog nga nagdagan ang van. Hinungdan nga nadumbulan siya sa maong van," asoy ni Tumulak.
Ang tulo ang dali nga gidala sa Talisay District Hospital, samtang ang mga driver sa duha ka sakyanan ang gidala sa Lawaan 1 police community precinct.
Ang duha ka mga driver ang nagkasabot nga moabaga sa galastuhan sa mga naangol.
Samtang nakig-alayon usab ang kapulisan sa Land Transportation Franchising and Regulatory Board (LTFRB) Central Visayas kalabot sa pagpamasahero niini nga colorum.
Subling pahimangno sa kapulisan ug sa CT-TODA sa mga motorista nga moagi sa CSCR sa pag-extra nga matngon diha sa pagmaneho aron kalikayan ang disgrasya.(Superbalita Cebu)