KAPIN sa tunga sa milyon ka pesos nga balor sa ilegal nga drugas ang nasakmit sa mga sakop sa Provincial Drug Enforcement Unit sa Cebu Provincial Police Office sa usa ka konsehal sa barangay sa Lungsod sa Pinamungajan.
Ang nasikop pinasikad sa search warrant nga giluwatan ni Judge Leopoldo V. Cañete, Executive Judge sa RTC Branch 60, sa Lungsod sa Barili mao si Socrates Nortez Bancog alyas Bombeeh, 41, taga Purok Bakhaw, Barangay Mangoto, Lungsod sa Pinamungajan.
Gawas sa ilegal nga drugas nga motimbang sa 75 gramos nga mokantidad sa P510,000, nakuhaan usab kini'g 17 ka bala sa kalibre .38 ug duha ka speed reloader sa kalibre .38.
Matod ni Police Captain Alejandro Batobalonos nga nalakip sa ilang listahan si Bancog nga nalambigit sa ilegal nga drugas nga mao'y hinungdan nga ilang gipanid-an sa pipila ka semana.
Human masuta ang ilegal nga kalihukan, mi-apply dayon sila'g search warrant sa korte nga mao'y hinungdan nga ila kining gi-serve alas 6 sa buntag, Abril 3 sa iyang panimalay. (AYB)