Dughan sa usa ka policewoman giingong gikupay sa iyang gikasakay nga lalaki sa bus de pasaheroan kay wa nasayod nga usa siya ka pulis.
Nag-atubang karon og kasong acts of lasciviousness ang suspek nga si Ritche Galon, 47, ulitawo, nagtrabaho og online, taga Maslog, Sibulan, Negros Oriental human sa insidente niadtong Pebrero 25, sa alas 4 sa kaadlawon sulod sa Ceres Bus sa Brgy. San Sebastian, lungsod sa Samboan.
Hinuon, si Galon nakagawas sa prisohan human nakapiyansa og P36,000 sa kasong acts of lasciviousness sa Pebrero 27, 2023 sa Municipal Circuit Trial Court (MCTC) Samboan-Santander sa lungsod sa Samboan.
Ang biktima nga si Melay (tinuod nga ngan gipugngan), 42, dalaga, sakop sa Mandaue City Police Office, maoy nikiha kang Galon.
Si Police Police Master Sgt. Jovelyn Gumabao, sa Women and Children Protection Desk (WCPD) sa Samboan Police Station nga exclusive nga nahinabi sa Superbalita Cebu, nagkanayon nga si Melay gikan sa Cebu South Bus Terminal (CSBT) sakay sa Ceres Bus padulong sa habagatang Sugbo.
Samtang siya nakatulog sa biyahe, iyang nabantayan ang suspek nga nitupad kaniya og lingkod sa pag-abot sa lungsod sa Alcoy.
Si Melay wa nag-uniporme niadtong higayuna, igo lang nagsul-ob og sweatshirt ingon man naka short pants.
Nakabantay siya nga dunay nihikap sa iyang tiyan.
“Gisiko niya, naigo, unya duka man, natulog siya pagbalik. Pag-abot sa bus sa terminal nakamata siya kay gihikap ang wala nga tutoy,” asoy ni Gumabao base sa asoy ni Melay.
Tungod niini, ang biktima nipaila nga siya pulis ug gipangunayan og dakop ang suspek.
Nangayo siya og abag sa mga staff sa shipping lines, diin gi-hold ang suspek dayon nanawag ang biktima sa Samboan Police Station diin gibalhog ang suspek.
“Nangayog sorry ni siya kay lagi natintal lang daw. Naibog nagtan-aw sa dughan sa pulis,” sumala ni Gumabao.
Bisan pa sa pagpangayo og pasaylo, gipasakaan gyud og tukmang kaso sa pulis ang suspek.
Mga usa ka semana kapin ang nakalabay, usa usab ka hamtong lalaki ang gidakop human giingong nangumot og tutoy sa usa ka babayeng estudyante sa dakbayan sa Carcar nga iyang gipasakay sa motorsiklo.
Nasikop siya sa entrapment operation sa kapulisan inabagan sa biktima pagkasunod adlaw kay nibalik sa dapit. (GPL)