Ang mga tinun-an sa UC METC gipahinumdoman mahitungod sa hinungdan ug mamahimong epekto, lakip na ang kamahinungdanon nga mapanalipdan ang kaugalingon sa pagkatap sa human immunodeficiency virus ug acquired immunodeficiency syndrome’ (HIV/ AIDS).
Ang maong mga tinun-an ubos sa pagdumala ni Professor Rogene Villa nga nipasiugda og seminar nga naghisgot sa HIV/AIDS sa katuyoan nga ilang kasuportahan nga mahunong ang stigma o ang dautang huna-huna sa katilingban niadtong nataptan sa maong sakit ilabi na ang diskriminasyon ngadto kanila.
Pinaagi sab sa maong seminar gitinguha sa mga tigpasiugda nga kahatagan og maayo nga panglantaw ug paglaom ang mga nataptan sa HIV/AIDS.
Nagsilbi nga resource speaker sa maong kalihokan ang HIV Counselor sa Department of Health Region 7 Joyce Cabije.
Dako og ikatampo ang maong lakang nga ang kabataan magmatngon mahitungod sa maong isyu.
Ang duha ka adlaw nga kalihokan niadtong Disyembre 7 ug 9 proyekto sa Stolt-Nielsen Scholars ug ubang tinun-an nga gipaluyohan ni Dr. Teresita Alfafara, nga gipahigayon sa UC METC Study Hall and Amphitheater, sa Alumnos Barangay Mambaling, dakbayan sa Sugbo.
Gawas sa seminar, dunay libre nga HIV screening, gipanghatag nga condoms ug lubricants. (FVQ, hulagway ni D/C Clavince Gacoscosim)