Naukay ang mga residente sa Sityo Cogon, Barangay Poblacion 1, Dakbayan sa Carcar tungod sa giingong ungo nga babaye nga matod pa nitugpa sa atop sa balay sa pamilyang Baraquia, niadtong Dominggo, Hulyo 9, 2023 sa kaadlawon.
Si Jonas Baraquia maoy nakakita ug nakahigayon og video gamit ang iyang mobile phone.
Diha sa ilang tugkaran ang tiguwang babaye nga wa siya nakaila ug iya kining gipangutana.
Viral na ang video nga gi-post ni Baraquia sa social media, diin sagad nga komento sa mga netizen nga ungo ang tiguwang babaye.
Asoy ni Baraquia sa dihang nahinabi live sa Superbalita nga mga ala 1:04 niadtong Dominggo sa kaadlawon human sa iyang pagkaligo, kay gibati siya og kaalimuot, sa sofa sa ilang sala siya natulog.
Siya nahigmata dihang kalit lang nga dunay nilagubo sa ilang atop.
Sa unang hagtok wa lang una niya panumbalinga apan sa ikaduha nga lain na sab ang milagubo, iyang gilili ang gawas gikan sa ilang bintana.
Nisugat sa iyang panan-aw ang usa ka tiguwang babaye.
Bisan sa tumang kahadlok ni Baraquia, iyang gipangutana ang maong ginang.
“Ang ingon niya nga taga Novaliches daw siya unya nagsakay daw siya og helicopter. Sa iyang pag-abot didto, akong gipangutana nangita daw siya og lumpia.
“Mao na nga akong giingnan nga wala may lumpia kay kaadlawon na karon. Mao to nangutana siya nga unsa na diay oras karon?,” saysay ni Baraquia.