GIINGONG utok sa investment scam sa Probinsya sa Bohol nga nakakuha og gibana-banang P300 million sa iyang gipang-ilad nadakpan sa kaulohan human nalutsan og warrant of arrest sa kasong large scale estafa sayo ning tuiga.
Ang nadakpan giila nga si Niño Ramos, taga Dakbayan sa Tagbilaran, Probinsya sa Bohol, tag-iya og forex trading company.
Matod ni Police Colonel Ireneo Dalogdog, hepe sa Criminal Investigation and Detection Group (CIDG) 7, nga niadtong 2020, nakadawat og reklamo ang ilang buhatan sa Bohol labot sa investment scheme nga gipadagan ni Ramos.
Ang mga reklamante nireklamo nga ang ilang kwarta nga gi-invest wala na nila makuha.
Kasagaran sa mga nabiktima ni Ramos mga pulis, huwes sa korte, doktor, trabahante sa gobiyerno ug dagkong mga negusyante sa Bohol.
Sila nakabubo og dagkong kantidad niadtong 2019.
Saad sa akusado nga ang ilang kwarta nga gibubu sa forex trading moginansya og 20 ngadto na sa 50 porsiyento sa usa ka buwan.
Apan natingala sila nga sa pagka Disyembre 2020 wa na mopakita sa Bohol ug ilang nahibaw-an nga tua na sa Novaliches, Quezon City.
Tungod niini, ang mga biktima ningduol kang kanhi PNP Chief Police General Debold Sinas aron mosang-at og kaso batok kang Ramos.
Niadtong Mayo 2021, nigawas ang warrant of arrest alang kang Ramos. Siya nasikop niadtong Agusto 29.
“Itong investment scam na ito ay nag start in the early of 2019. Nag-offer sila ng 20 percent interest doon sa mga investor na gustong magkakaroon ng additional income. Pero December 2020 sumibat na dahil ang rumors doon mismo sa Bohol area, nalaman na investment scam nga itong ginagawa niya,” matod ni Dalogdog.
Gibana-bana sa mga biktima nga nakadala si Ramos og P300 million gikan sa dagkong mga opisyal sa gobiyerno ug mga negusyante sa Bohol.
Duna pay laing 45 ka mga reklamante ningdangop sa ilang buhatan aron mosang-at og reklamo nga gitakdang ipasaka nila ngadto sa korte.
Si Dalogdog makig-alayon sa CIDG sa kaulohan aron dalhon si Ramos sa Bohol.
Samtang mitahan usab sa National Bureau of Investigation (NBI) sa Negros Oriental ang usa ka pastor human nakadawat og hulga sa iyang kinabuhi. Ang pastor giila nga si Agustin Fontillas.
Apan human masayod ang publiko sa Negros nga nitahan si Fontillas, daghan ang miadto sa buhatan sa CIDG sa Dumaguete aron ireklamo nga sila biktima sa pastor sa usa ka investment scam.
Dala nila ang mga dokumento nga magpamatuod nga si Fontillas nagpadagan og investment scheme dungan sa saad nga ang ilang gibubu nga kwarta motubo og 50 porsiyento matag semana.
Giingong nakadagit si Fontillas og P10 million gikan sa mga tawo nga ni-invest kaniya.