Valid ID kinahanglan sa pagrehistro sa Comelec

Valid ID kinahanglan sa pagrehistro sa Comelec

Andam na ang Commission on Election (Comelec) sa Sugbo alang sa pagdawat sa mga gustong moparehistro pangandam sa umaabot piniliay sa Oktubre 30, 2023.

Si Atty. Lionel Marco Castillano, acting regional director sa Comelec sa Central Visayas, nagkanayon nga niabot na ang supplies gikan sa Central Office sa Comelec nga maoy gamiton alang sa registration.

Nahuman na usab og training ang tanang election officers alang sa pagdawat sa concerns sa mga botante ug bag-ong botante.

Subay niini, gipahimangnoan ni Castillano ang mga batan-on nga new registrants sa pag fill-up daan sa downloadable application forms nga anaa sa www.comelec.gov.ph aron dili malangay sa unang adlaw sa pagbalik na sa registration sa Comelec offices.

Matod ni Castillano, mas sayon na ang pagrehistro karon kon itandi sa milabayng katuigan nga anaa sa tulo ka pahina pa ang kinahanglan nga suwatan sa mga batan-on aron makaparehistro.

Gawas sa form, gikinahanglan usab nga dad-on ang bisan unsa nga valid ID aron masusi ang identity sa moparehistro.

“Kuhaan man ka og biometrics ayaw gyud paggamit og fake nga ID. Tungod kuhaan ka og biometrics mahibaw-an namo if narehistro ba ka sa lain lugar. Makiha nuon ka. Double registration is a crime one to six years ang penalty niana,” matod ni Castillano.

Kinahanglan usab nga mosunod sa health protocols aron kalikayan ang pagtakod sa bisan unsang mga sakit.

Sa sunod semana, gilaoman ang pagbukas sa mga satellite registration sites aron paghatag og dugang lugar nga maduolan sa nga gustong moparehistro, magpausab o kadtong gitawag nga correction of entry, mobalhin og botar ug kadtong gusto magpa-reactivate.

Kon duha ka eleksyon nga wala na makabotar, giawhag usab ni Castillano nga magpareactivate aron makabotar sa umaabot piniliay.

Samtang posibleng buksan usab ang pagrehistro sa malls sa Sugbo aron paghatag og kasayon ang mga Sugboanon sa ilang transactions.

“Ang atoang Central Office sa Comelec Manila naghimo na og memorandum of agreement with Robinsons and SM for us to conduct registration sa malls free of charge given to the Comelec. Puhon-puhon mag mall registration na pod ta to make it convenient sa atong voters to register,” gidugang ni Castillano sa Disyembre 11, 2022.

“Bisan sab sa Gaisano malls kay magdepende man na kon unsay available nga mall sa usa ka lungsod or siyudad,” dugang ni Castillano.

Ang registration molanat pa hangtod sa Enero 31, 2023.

Bukas kini matag Lunes hangtud sa Sabado alas 8:00am-5:00pm.

Mahimong makaparehistro kadtong mga mag-edad og 15 anyos sa Oktubre 30 o sa dili pa ang adlaw sa piniliay.

Mahimo na usab moparehistro alang sa barangay election ang mga batan-on nga nag-edad og 18 anyos.

Alang sa mga importanteng anunsyo sa schedules, gi-awhag ang publiko nga mosusi sa social media pages sa Comelec offices sa kalungsoran ug mga siyudad. / ANV

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph