PATAY ang usa ka 70 anyos nga tindera sa Carbon Public Market human gipusil sa duha ka wa pa mailhing mga lalake pasado alas 9 sa gabii sa Martes, Hunyo 25, sa dalan V. Gullas eskina Lincoln, Barangay Ermita, Dakbayan sa Sugbo.
Ang tindera o vendor mao si Erlinda Garcia, 70, biyuda, lumad nga taga Barangay Tuyokon, lungsod sa Aloguinsan, Sugbo apan kasamtangan nga nagpuyo sa dalan Magallanes, Barangay Ermita.
Duha ka mga lalake giingong lang niabot sa dapit samtang si Garcia nagbantay sa iyang tindahan nga gisakay lang sa bangko nga ginama sa kawayan.
Diha-diha gipusil si Garcia tumong sa ulo sa makadaghang mga higayon. Patay ang tiguwang.
Mga nagtrabaho sa mga tindahan sa lugar nitug-an sa mga pulis nga buto-buto sa armas ang ilang nadungog.
Ilang nakita ang duha ka mga lalake nga nagbaktas paingon sa motorsiklo nga getaway vehicle.
“Nagtalikod man ko kay nanghipos ko. Mao na may akong namatngunan nga niboto. Abi nako og paboto- boto ra. Sus! Paglingi nako, kay nikayo man. Ah wa na ko kahibawo unsay angay buhaton. Kakuyaw!”, saysay sa silingan nga tindera.
Dali nga nisibat ang mga killer paingon sa dalan Plaridel, Barangay Ermita, apan wa nila makit-i ang plate number sa motorsiklo sa gisakyan niini.
Matod sa tindera nga dugay nang naninda si Garcia sa lugar. Daghan kini og tinda sama sa mantika, asin, sigarilyo, plastik ug uban pa.
Wa siyay namatikdan nga naay nakaaway tungod kay mag- abot ra sila kada gabii sa maong oras aron sa pagpaninda.
Nakakuha og upat ka mga basiyo sa bala sa gituohang calibre 9mm ang mga sakop sa Scene of the Crime Operation (Soco) nga gitakdang ipaubos sa cross matching.
Matod ni Police Major Randy Caballes, hepe sa Carbon police station, wa pa silay matumbok nga motibo. (AYB & Jennylen Mabini, CNU Comm Intern)