Dili mahitabo nga ang usa ka iro mopatay sa iyang agalon nga gikauban niini sulod na sa upat ka tuig.
Kini ang pamahayag ni Dr. Jessica Maribojoc, pangulo sa Department of Veterinary Medicine and Fisheries (DVMF) sa dakbayan sa Sugbo sa mga sakop sa media sa Lunes, Oktubre 2, 2023.
Reaksiyon kini ni Maribojoc bahin sa 63 anyos nga lalaki nga si George Mayol, taga Sitio Molila, Barangay Lawaan 1, dakbayan sa Talisay nga giingong gipatay sa kaugalingong mga iro niadtong Septiyembre 28, 2023.
Si Mayol napalgang patay sulod sa pansayan duol sa iyang balay nga dunay daghang mga samad ug uban pang garas sa iyang lawas.
Si Rodrigo Mayol, maguwang sa biktima, niingon nga dugay na niyang gipahimangnoan ang iyang maguwang nga dili magbuhi sa maong matang sa iro kay mangunay og agalon.
“Actually kon ako personally as a veterinarian, di gyud ko motuo sa iro ang ningpatay sa iyang owner,” matod ni Maribojoc.
Matod ni Maribojoc nga ang lihok sa iro nagpakita sa pagtagad sa tag-iya niini.
Si Maribojoc nihatag og ehemplo nga kon adunay pagbinatiay tali sa tag-iya ug sa iro, dili kini mopaak.
“Dili gyud na siya mopaak maski gani imo pa na siyang kusion, imo pa na siyang binuangan. Basta naay trust sa iro ug naa siyay bond sa owner, dili na siya mamaak,” dugang ni Maribojoc
Laing rason sa pagduda ni Maribojoc sa iro nga gipasanginlan nga nipatay sa biktima mao ang iyang assessment sa hayop.
Si Maribojoc niingon nga posibleng dunay laing rason sa kamatayon ni Mayol.
“Kon moingon ta na rabid ang dog, anytime mo attack na siya maskin naka cage na siya. You can see (mga iro ni Mayol), ang dog kalma ra,” matod ni Maribojoc.
Gikwestiyon ni Maribojoc kon pila na ka oras o adlaw ang milabay sukad sa kamatayon sa tag-iya ug nakita niya ang posibilidad nga dunay foul play.
Si Police Lt. Col Wayne Magbanua, hepe sa Talisay City Police Station, niingon sa mga tigbalita nga ilang gisugyot ngadto sa kabanay sa biktima nga ipaubos sa autopsy aron masuta ang hinungdan sa kamatayon niini.
Apan matod ni Magbanua, gibalibaran sa pamilya ang maong proposal kay kumbinsido sila nga namatay kini human giataki sa iro.
Nakugang sab ang kapulisan nga gi-cremate na ang lawas sa biktima nga wa sila nasayod.
Pinaagi unta sa autopsy, masuta kon tinuod bang iro ang nipatay sa biktima, apan kay gi-cremate na, di na kini mahimo. (RJM)