SUD sa 10 ka adlaw, temporaryo nga sirad-an ang duha ka lanes sa viaduct sa Marcelo Fernan Bridge sugod karong Agusto 8.
Si Engr. Eda de Guzman, pangu sa maintenance section sa Sixth Engineering District sa Department of Public Works Highways (DPWH) 7, nipahibawo nga ayuhon ug i-rehabilitate ang viaduct sa bag-ong taytayan nga gigahinan og P20 milyones diin paningkamotan sa nidaog nga contractor, ang PLD Construction, nga mahuman ang pagtrabaho sud sa lima ka adlaw.
Siya nipahibawo niini atol sa binuwan nga tigom sa mga sakop sa Mactan-Cebu Bridge Management Board (MCBMB) kagahapon sa Kapitolyo.
Siya niingon nga gasige og kadaot ang mao nga bahin kay kining dapita ang stress gumikan sa kakusog sa impact sa mga sakyanan nga molabay sa dapit.
Bisan og sirad-an ang viaduct, si de Guzman namulong nga maagian gihapon ang lane paingon sa Lapu-Lapu ug Mandaue.
Matod niya, susamang traffic scheme ang ilang ipatuman sa viaduct dihang gisirad-an usab kini niadtong 2014 tungod kay gitauran og expansion joints.
"So, when we close the viaduct, among i-direct ang traffic towards the right, inig naog nila sa ubos, make a u-turn papunta na dayon its either airport or MEPZ (Mactan Export Processing Zone)," sumala ni de Guzman dihang nahinabi sa mga tigbalita human sa tigom kagahapon.
Siya nibutyag nga gawas sa viaduct, padayon usab ang maintenance works ug pag-ayo sa main component sa ikaduhang taytayan nga gipundohan og P27 milyones. (SCG)