NAPUTOL ang kaalegre nga pagsayawsayaw sa nanambong sa 10th anniversary sa Ako Bisaya Partylist nga gipahigayon sa Tambuli Resort sa Maribago sa siyudad sa Lapu-Lapu niadtong Sabado sa gabii, Mayo 22, dihang nahagba sa dance floor si Consolacion Vice Mayor Teresa ‘Nene’ Alegado.
Naglingaw ang grupo uban sa bise mayor sa pagsayaw nga nagsunod sa pagtuyoktuyok sa dance floor ug pagkahuman, nagtinagsa sa pagsud sa sirkulo aron masentro sa pagsayaw.
Ug sa turno ni Alegado, maayo kini nakakimbutkimbot apan, kalit lang nawad-an siya sa balanse ug nahagba sa dance floor.
Daling niduol aron pagluwas ang iyang anak nga si Consolacion Mayor Joannes Alegado, kinsa usa ka doktor ug apil usab sa nitambong sa salosalo nga kasagaran mga opisyal sa kagamhanan ug mga personahe sa pulitika sa Sugbo, ug ilang gidali pagdala sa ospital.
Nasayran ning tagsuwat nga nadat-ogan sa bukobuko sa bise mayor ang iyang walang kamot ug bukton dihang natumba hinungdan nga wala dayon kini makabangon.
Dugang nasayran nga luwas ra ang kahimtang sa mayor.
Atol sa selebrasyon, nipahibawo si Kong. Sonny Lagon sa iyang pagluwat sa katungdanan sa Ako Bisaya ug nanumpa nga bag-ong sakop sa One Cebu Party.
Si Gobernador Gwendolyn ‘Gwen’ Garcia maoy nipapanumpa kang Kong. Lagon ug uban pa nga nagpasilong sa One Cebu Party.
Nipadayag siya sa iyang interes sa pagdagan isip representante sa Ubos Balay-Balauranan alang sa 6th district sa Sugbo.
Ang iyang kapikas nga si Daphne Lagon maoy mihulip sa katungdanan sa Ako Bisaya ug gitudlo nga first nominee sa Ako Bisaya Partylist samtang si Consolacion Mayor Joannes Alegado maoy 2nd nominee sa partylist.
Nakasaksi sa hitabo si Kong. Pablo John “PJ” Garcia, Provincial Board Members Glenn Soco ug Jose Mari “Tata” Salvador, Cordova Mayor Techie Sitoy-Chu ug mga kapitan sa lungsod sa Cordova.
Si Gobernador Garcia nakapauli na dihang nagsadya sa pagsayaw ang nanambong sa party ug wala na makasaksi sa pagkahagba ni Bise Mayor Alegado.
Ang Ako Bisaya maoy nagdala sa tingog ug interes sa mga Bisaya sa kongreso isip sectoral representative human nakakuha og 20 porsiyento sa botos sa miaging nasudnong eleksiyon.