Dili mominos 156 ka mga sakop sa New People’s Army (NPA) ang na-neutralized sa tanang units sa Armed Forces of the Philippines (AFP) sa Kabisay-an gikan sa Enero 1 ngadto sa Hunyo 30, 2023.
Kini gikan sa taho sa tanang commander sa AFP sa Kabisay-an atol sa ilang command conference sa Visayas Command (Viscom) sa miaging semana.
Sa maong gidaghanon, 42 ang nakalas sa engkwentro batok sa mga sundawo, 11 ang nadakpan atol joint law enforcement operations ug 103 ang nibalik sa sabakan sa balaod.
Gawas niini, nakasakmit usab ang gobiyerno og 223 ka mga armas ug 82 ka anti-personnel mines.
Sa pag-neutralize sa mga sakop sa NPA, naglakip kini sa 12 ka high-value individuals, usa na niini ang giingong rebelde nga si Rogelio Posadas, kalihim sa Komiteng Rehiyon Negros, Cebu, Bohol, Siquijor nga nakalas sa engkwentro niadtong Abril 20, 2023 sa Binalbagan, Negros Occidental.
Tungod sa maong kalampusan, si Philippine Army Lieutenant General Benedict Arevalo, commander sa Viscom, nidayeg sa iyang mga sakop subay sa malampuson nga kampanya batok sa terorismo.
“I would like to congratulate everyone for a very good job for the 1st Semester of 2023. The exceptional performance that you have shown manifests your strong desire and motivation to serve and protect our people and end the local communist armed conflict in this part of the country,” matod ni Arevalo.
Sulod sa buwan sa Abril ug Mayo, nakasinati ang teroristang grupo og dakong kapildihan sanglit 21 ka mga NPA ang na-neutralized ug 25 ka mga armas ang nasakmit.
SAMAR
Mabantayan nga niadtong Abril 30, 2023 sa Barangay Santander, lungsod sa Borbon, Probinsya sa Samar, naengkwentro sa 803RD Infantry Brigade Philippine Army, ang NPA Sub-Regional Guerilla Unit (SRGU) ubos sa Sub-Regional Committee ‘Emporium’ nga niresulta sa pagkamatay sa pito ka miyembro sa NPA, usa ang nitahan ug upat ka high powered firearms ang naimbargo.
NEGROS
Sulod usab sa tibuok buwan sa Mayo, niabot sa 40 ka nga NPA ang na-neutralized ug 54 ka armas ang nasakmit atol sa sunod-sunod nga engkwentro sa mga sakop sa 62nd Infantry Battalion batok sa nahabiling mga rebelde sa Central Negros 1 ubos sa Komiteng Rehiyon Negros, Cebu, Bohol, Siquijor sa Moises Padilla, Negros Occidental ug sa Guihulngan City, Negros Oriental.
Sa maong engkwentro siyam ka NPA ang namatay, duha ang nitahan ug 14 ka mga armas ang nabawi sa gobiyerno.
Gipasigarbo sa Viscom nga moabot sa 942 ka organisasyon sa masa ang namugna ug mikooperar sa gihimong community program sa kasundalohan sa Kabisay-an diin ang 342 niini naa sa Eastern Visayas.
BSKE
Gikalipay kini ni Arevalo tungod kay dako kinig ikatabang sa ilang pagpangandam sa nagsingabot nga Barangay ug Sangguniang Kabataan Election (BSKE) sa Oktubre 30, 2023.
“The support of our people is vital in our campaign to end the reign of terror in the region. As we sustain our focused military operations to prevent the CPP-NPA from taking advantage of the upcoming Barangay and SK Elections,” sumala pa ni Arevalo.
Subay niini, iyang gidasig ang kasundalohan sa Visayas nga ipadayon ang nasugdan nila nga kampanya diin sulod sa unom ka buwan, nagmalampuson sila sa ilang tumong mapuhag ang hut-ong sa mga rebelde.