Viscom: Magtiayong Tiamzon patay sa engkwentro, di torture
Nangamatay sa engkwentro sa miaging tuig ang magtiayong Benito ug Wilma Tiamzon sa engkwentro tali sa militar sa Samar niadtong Agusto 2022, di sa torture.
Ang magtiayong Tiamzon tag-as nga mga opisyal sa Communist Party of the Philippines (CPP), nadakpan sa kapulisan dinhi sa Sugbo apan gipapiyansa sa administrasyong Duterte niadtong 2016 aron moapil sa peace negotiation tali sa kagamhanan nga magrepresentar sa mga rebeldeng komunista.
Hugot nga gihimakak sa Visayas Command ang pangangkon sa CPP sa gipublikar sa ilang official website nga nipasangil sa Armadong Kusog sa Pilipinas nga ni-torture sa magtiayong Tiamzon uban sa walo pa ka mga sakop sa Central Committee sa wala pa kini patya.
Una nang gikompirmar sa CPP nga nangamatay ang magtiayong Tiamzon niadtong Agusto 2022. Si Benito nagsilbing executive committee chairperson samtang si Wilma secretary general sa CPP.
Nipasangil ang CPP nga gipaantos sa mga sundalo ang magtiayon sa dihang sila nadakpan sa Catbalogan, Samar.
Nakaangkon, matod pa, og grabeng bun-og sa nawong ug kalawasan ang magtiayong Tiamzon ug ang walo ka kaubanan niini tungod sa pag bunal kanila sa gahi nga mga butang ug gilabay sa motorbanca ug gipabuto.
“Apparently, the statement is nothing but a mere propaganda. This a blatant attempt of the CPP to once again deceive the Filipino people by spreading lies and fabricating stories. The allegations of capture and torture are part of their misinformation to discredit the successful operation of the government against their group,” matod ni Lieutenant General Benedict M. Arevalo.
Dugang ni Arevalo nga dugay na sila nagduda sa kamatayon sa magtiayong Tiamzon atol sa encounter niadtong Agusto 22, 2022 sa kadagatan sa Samar tali sa mga sundawo nga ningresponde sa taho nga dunay mga opisyal sa CPP nga nagsakay og bangka.
Gihulagway kini nga nagdala og mga eksplusibo.
Matod ni Arevalo nga walay nahimong dakop ug giingong pag torture sukwahi sa pasangil sa CPP.
Ang operation usa ka lehitimo nga encounter sa dihang ilang girespondehan ang report labot sa presensya sa New Peoples Army (NPA) nga padung na nga mosibat.
Unang gipabuthan ang mga sundalo sa dihang gisuwayan sa pagpahunong ang motorbanca gamit ang ilang megaphone.
Apan nibuto ang motorbanca tungod sa sinukliay sa bala tali sa mga sundalo ug NPA.
Pipila ka mga adlaw ang nakalabay, mga debris sa bangka ug nagkadaiyang bahin sa lawas nakaplagan sa mga mananagat ug lumolupyo sa Samar.
Gihangop hinuon ni Arevalo ang pag angkon sa CPP nga ang magtiayong Tiamzon ug mga kauban nakalas.
“Justice has indeed been served. The fugitives’ demise, if it is indeed true, is a huge loss to the terrorist group, as this would create a leadership vacuum in their organization and cause them to lose operational direction on the ground.
“The Tiamzon couple are not heroes as the article of the CPP would want to claim. They don’t deserve martyrdom. Their names will forever be remembered by the countless lives who have suffered and perished brought by their deceit, violence, and terror acts,” dugang ni Arevalo.
Awhag niya sa ubang mga sakop sa CPP-NPA sa Visayas region nga itahan ang ilang mga armas ug mobalik na sa sabakan sa gobyerno samtang may panahon pa.