Wa mi diktari: Hiyas, kaalyado ni Radaza

GIKLARO sa mga konsehal nga kaalyado ni Kongresista Paz Radaza sa lone district sa Dakbayan sa Lapu-Lapu nga way nagdiktar kanila kon unsay angay nga ipalabang o babagan nga mga ordinansa ug resolusyon nga moagi sa Sangguniang Panglungsod (SP).

Kini ang tubag ni Konsehal Flaviano “Bobit” Hiyas, majority floor leader sa Konseho sa Dakbayan, sa isyu nga giingong kanunay adunay magmando kanila sa pagbabag sa mga kaayohan sa dakbayan ubos sa administrasyon ni Lapu-Lapu City Mayor Junard “Ahong” Chan.

Mayoriya sa konseho nailang mga kaalyado sa mga Radaza nga higpit nga karibal sa pulitika ni Chan.

Matod ni Hiyas nga kon susihon ang minutes sa ilang mga session sukad nilingkod si Chan isip mayor, klaro ug tataw nga igo ra sila nagsilbing “fiscalizer” o tig-ayag sa tanang resolusyon ug ordinansa nga ipasar, lakip na ang mga lakang sa mayor nga kinahanglan pa moagi sa konseho.

Gihimong basehan ni Hiyas mao ang pag-uyon sa tanang konsehal sa pagpasar sa resolusyon nga nagdeklarar og state of calamity sa isla sa Olango nga naapektohan sa giisang gale warning sayo ning buwana.

Giangkon hinuon ni Hiyas nga aduna hinuoy pipila ka mga hisgotanan sa konseho nga magsumpaki ang baroganan nila ug ni Chan.

Kini sama pananglit sa plano untang pag-override sa konseho sa veto ni Chan sa ordinansahon nga magkinahanglan pa og pagtugot sa konseho ang si bisan kinsang adunay planong mo-develop og usa ka foreshore land sa dakbayan.

Ang konseho nibarog nga di paglangay-langay sa proseso sa pagnegosyo ang ordinansahon kon dili gusto lang nilang ma-regulate ang pag-develop sa mga foreshore land sa dakbayan.

Ang pag develop pa lang daan ug usa ka foreshore land langay na matod ni Hiyas gumikan sa daghang permit nga kuhaonon hinungdan nga walay rason nga di sila mohatag ug oras sa pagkuha usab og approval sa konseho.

Ang maong pag-override wa molampos human nga wa makuha ang 2/3 sa mayorya sa konseho atol botasyon.

“Duty-bound man mi under the Local Government Code nga motan-aw ug mohimo og ordinansa para pag protect ug pag-preserve sa amoang properties ug sa amoang municipal waters ug sa environment amo na lang na e-relinquish kay bahala na lang mayor ana? Ang pangutana who are the best person or entity nga motan-aw og unsay angayan diha sa city ang usa lang ka tawo o ang council nga composed of persons who come from different walks of life?,“ pagpasabot ni Hiyas.

Niadtong miaging Miyerkules, Agusto 28, si Chan namahayag nga adunay walo ka mga konsehal nga nailang kaalyado sa mga Radaza ang iyang gihatagan og staff bugti sa pagsuporta sa iyang administrasyon. (GCM)