Namatay paglabay sa 30 minutos ang usa ka lalaking gipusil alas 8:55 sa gabii sa Huwebes, Marso 30, sa iyang silingan ug laing duha ka mga kauban tungod sa giingong wa pag remit sa halin sa illegal drugs.
Si Police Staff Sergeant Benjamin Maglajos sa Inayawan Police Station sa Cebu City Police Office (CCPO) niila sa biktima nga mao si Edgardo Cantillas Insila, alyas Istoy, 31, taga Sityo Tunoblapok, Barangay Inayawan, Siyudad sa Sugbo.
Samtang ang suspek giilang si Fernando Gaviola, 30, silingan ra sa biktima, ug laing duha pa ka wa mailhing mga lalaki nga kauban ni Gaviola nga ningtabang sa pagpusil sa biktima.
Matod ni Maglajos nga si Insila naglingkod sa sityo Tunoblapok kay nagkalingaw sa pagduwa og Mobile Legend sa iyang cell phone dihang niabot ang suspek ug duha ka mga kauban.
Gisangpit pa ni Gaviola si Insila ug sa paghangad sa biktima, giingong gipusil gilayon siya sa suspek ug sa duha ka wa mailhing mga kauban.
Si Insila nga dunay mga samad sa nagkadaiyang bahin sa lawas daling gidala sa tambalanan, apan namatay.
Matod ni Maglajos nga ang suspek ug biktima pulos nangalambigit sa illegal drugs.
Nagtuo sila nga gitambling ni Insila ang drugas, wa gi-remit ang halin hinungdan nga siya gipatay sa suspek.
Sila si Gaviola ug duha niya ka mga kauban wa pa madakpi sa kapulisan sa pagsuwat ning taho.