Nidangop sa kapulisan ang usa ka babaye nga gikulata sa iyang kapuyo gumikan sa pagbalibad niini nga makig-sex.
Ang pagkulata nahitabo alas 3:45 sa kaadlawon niadtong Sabado, Marso 19, 2022, sud sa ilang pinuy-anan.
Ang biktima gitago sa pangan nga ‘Ana’, 23, taga Pinabacdao, Samar samtang ang suspek gitago sa pangan nga Keith, 45, taga Calbiga, Samar.
Matod sa kapulisan, si Ana kauban ang iyang inahan ang nidangop sa kapulisan aron isumbong ang pagpanapat.
Nasayran nga nianang sayo sa buntag samtang tugnaw ang panahon, miinit ang lawas ni Keith ug nanguhit kang Ana aron makig-sex.
Ang kahidlaw sa suspek napakgang human gibalibaran sa biktima ang iyang hangyo.
Ang kainit sa lawas sa suspek nisaka sa ulo niini hinungdan nga iyang gikulata ang biktima nga nakaangkon og bun-og.
Human sa insidente, ang suspek nisibat ug miuli sa balay sa iyang ginikanan sa Calbiga, Samar.
Nisumbong ang biktima sa iyang inahan ug nidangop sa kapulisan.
Ang biktima kauban ang mga pulis miadto sa panimalay sa ginikanan ug didto nakit-an nila ang suspek.
Sa dihang dakpon na unta ang suspek, mibabag ang amahan niini nga dako og tingog ug nakiglalis sa kapulisan ug pwersahan nga midepensa sa iyang anak.
Gisuwayan pa og ilog sa amahan ang service firearm sa pulis apan napugngan kini ug giapil pagsikop gumikan sa iyang pagbabag.
Kasong kalapasan sa Article 151 sa Revised Penal Code o obstruction of justice ang giatubang sa amahan samtang kalapasan sa Violence Against Women and Children ang giatubang sa suspek.
Ubos sa balaod sa Marital Rape, ang bana makiha og lugos kon nakig-sex sa kapikas bisan supak sa kabubut-on sa babaye.
Karong buwana, gisaulog ang Women’s Month agi og pagtimaan ug pagtahod sa katungod ug kamahinungdanon sa kababayen-an.