Tungod kay di na siya hapit makaagwanta sa iyang sakit, usa ka 65 anyos nga lolo nitungab og tunga sa botelyang muriatic acid sulod sa Fuente Osmeña rotunda sa dakbayan sa Sugbo sa alas 6:30 sa Biyernes sa gabii, Oktubre 14.
Si Police Senior Master Sergeant Jephthah Jumawan sa Abellana Police Station sa Cebu City Police Office (CCPO) nga maoy miimbestigar, niingon nga si Noel (di tinuod niyang ngan) taga Happy Valley, Barangay Guadalupe, Siyudad sa Sugbo.
Sa pakisusi ni Jumawan, nisulti kaniya si Alejandrio Bacayan, gwardiya sa rotunda, nga iyang nakit-an si Noel nga niadtong tungora ingon sa nagping-it sa kasakit hinungdan nga iyang giduol.
Didto iyang nakompirmar nga nagping-it kini sa kasakit ug tupad niini ang usa ka botelya sa muriatic acid, katunga niini nahanaw na.
Gituohan nga giinom kini ni Noel, kinsa daling gidala sa Cebu City Medical Center (CCMC).
Tupad ni Noel ang usa ka sling bag nga dunay sulat niini.
Didto nakasuwat ang iyang problema nga ginamulo sa lawas ug dili na niya makaya hinungdan nga siya magpakamatay.
Sa pagsuwat ning taho, giobserbahan pa siya sa mga doktor.