Aron matubag ang kakuwang sa public housing ug resettlement sa mga kabos ug walay pinuy-anan, ang Cebu City Government gusto nga makaangkon og 57 ka parsela sa yuta nga adunay luna nga kapin sa 60 ka ektarya sa upat ka mga barangay ug ideklarar kini nga “as socialized and economic housing sites.”
Sa proposed resolution nga gipirmahan ni Bise Mayor Raymond Alvin Garcia, ang 57 ka parcels of lands gitumong alang sa South Coastal Urban Development (Scud) project sa Barangay Mambaling, Basak San Nicolas, Cogon Pardo, ug Inayawan.
Base sa Local Housing Board Resolution 2023-08-053, gusto sa Siyudad nga makaangkon og 12.792 ka ektarya sa Mambaling, 13.275 ka ektarya sa Basak San Nicolas, 17.742 ka ektarya sa Cogon Pardo ug 19.424 ka ektarya sa Inayawan.
“In a vision of becoming a Singapore-Like Cebu City, sustainable development is essential to improve the quality of life, promote economic prosperity that ensures the well-being of all Cebu City residents,” matod sa resolution.
Sa pakighinabi sa telepono, si Garcia nitug-an sa SunStar Cebu niadtong Sabado, Oktubre 7, 2023, nga ang gahin nga P20 ngadto sa P25 bilyunes alang sa proyekto nalakip na sa 2023 budget.
Sa dihang gipangutana bahin sa timeline, si Garcia wala mohatag og direktang tubag, apan miingon nga tumong sa Siyudad nga mahuman ang proyekto sa labing dali nga panahon.
Matod niya nga sa higayon nga mahibalik ang budget sa general funds, iapil nila ang samang budget matag tuig hangtod magsugod ang construction. (AML)