Dili madayon ang Panagtagbo Festival Queen 2021 final showdown sa Dakbayan sa Mandaue karong Agusto 27 tungod sa pag-extend sa modified enhanced community quarantine (MECQ) status sa dakbayan hangtod Agusto 31.
Karong buwana, saulogon sa Dakbayan sa Mandaue ang ika-52 nga anibersaryo sa Charter day.
Sa pakighinabi sa Superbalita Cebu ni Ernie Manatad, pangulo sa Association of Barangay Councils (ABC), siya niingon nga dili una ipadayon ang Panagtagbo Festival Queen 2021 sa katapusan nga showdown sa Dakbayan sa Mandaue karong buwana.
Giasoy niya nga ang Panagtagbo Festival magsilbing selebrasyon sa kultura ug arts sa dakbayan sa pagsaulog sa Charter day.
Niadtong Agusto 11, 2021, mipalabang ang konseho og ordinansa nga giduso ni Mandaue City Councilor Immaline Cortes-Zafra, chairman sa committee on tourism ug ni Manatad, nga mohatag og P50,000 nga subsidy ngadto sa matag cluster barangay nga mosalmot sa Panagtagbo sa Mandaue Festival.
Ang mga barangay sa matag cluster mao ang Cluster 1 (Tipolo, Guizo ug Subangdaku), Cluster 2 (Centro, Ibabao, Mantuyong ug Alang- Alang), Cluster 3 (Looc, Opao ug Cambaro), Cluster 4 (Umapad ug Labogon), Cluster 5 (Tabok, Basak ug Jagobiao), Cluster 6 (Banilad, Bakilid ug Maguikay), Cluster 7 (Casuntingan, Cabancalan ug Tingub), ug Cluster 8 (Casili, Cubacub, Canduman, Tawason ug Pagsabungan).
Gipasabot ni Manatad nga kini nga subsidy bunga sa paghangyo sa mga opisyal sa barangay ngadto ni Mandaue City Mayor Jonas Cortes nga hatagan sila og dugang nga suporta alang sa mga costume, training ug uban pang gastuon sa kandidata.
Nangayo sila og subsidy, matod ni Manatd, ang mga barangay walay igong budget contest tungod nagtutok una sila sa ilang operasyon kabahin sa pagsumpo sa Covid-19.
Bisan sa pagka-postpone sa kalihokan, matod ni Manatad, gipalabang gihapon nila ang ordinansa.
Sigon ni Manatad, mapasalamaton siya nga ang kalihokan nahunong una aron aduna silay igong oras aron maproseso ang mga kinahanglanon nga dokumento alang sa subsidy ug masugdan na nila ang ilang pagpangandam sa maong contest.
Samtang, ang konseho sa siyudad mipalabang sab og ordinansahon aron hangyuon si Presidente Rodrigo Duterte nga mag-isyu og usa ka Presidential Proclamation nga modeklarang special non- working holiday sa Agusto 30, 2021 alang sa dakbayan sa Mandaue aron isaulog ang ika-52 nga Charter day sa dakbayan. (KFD)