ANG gaming technology firm Globaltech Mobile Online Corp. (Globaltech) namahayag sa Huwebes, Mayo 9, hingpit nga nisalikway sa pasangil ni Cebu City Mayor Tomas Osmeña nga kini nibayad og “payola” bugti sa police protection alang sa Peryahan ng Bayan games sa Bohol.
Sa usa ka pamahayag, si Globaltech head for legal Bernard Vitriolo niingon nga wa na kinahanglana pang mobayad sila og illegal protection money kang Cebu City Police Director Royina Garma tungod kay ang mga bola sa Peryahan ng Bayan games “legal and deserving of protection by the Philippine National Police (PNP).”
Sa miting de avance sa Bando Osmeña Pundok Kauswagan (BOPK), si Osmeña namasangil nga si Garma, isip pangu sa Criminal Investigation and Detection Group (CIDG) sa Central Visayas, nagdawatan og payola nga P1 million matag semana bugti sa proteksyon sa kapulisan sa Peryahan ng Bayan games sa Bohol.
Si Vitriolo niingon nga sila naguol nga ang ilang kompaniya nalambigit sa kasungian tali nila ni Osmeña ug Garma.
Ang mayor nakamansa sa reputasyon sa Globaltech, matod ni Vitriolo. (SunStar Philippines)