Mobalhin sa Cleveland Cavaliers ang guard nga si Lonzo Ball gikan sa Chicago Bulls pinaagi sa trade ilis kang forward Isaac Okoro.
Si Ball nag-average og 7.6 ka puntos, 3.4 ka rebounds ug 3.3 ka assists sulod sa 35 ka duwa sa miaging season human siya wala kapaduwa sa tibuok 2022-23 ug 2023-24 tungod sa injury sa tuhod.
Niagi ang 27-anyos nga si Ball og meniscus ug cartilage transplant sa iyang left knee Marso 2023 human wa maayo sa duha ka surgeries ang iyang piang nga nakuha sa first season sa Chicago tuig 2021-22.
Si Ball, nga gipili sa Los Angeles Lakers isip second overall pick sa 2017 NBA Draft, wala makaduwa sa last two months sa season tungod sa sprained right wrist.
Nagkinahanglan og point guard ang Cavaliers karon ilabi na nga si Ty Jerome mahimong unrestricted free agent, samtang si Darius Garland lagmit dili kasugod sa regular season human na-operahan sa left big toe.
Nakuha sa Cavaliers ang ikaduhang labing maayo nga record sa NBA nga 64-18, apan nahagsa sila sa Eastern Conference semifinals batok sa Indiana Pacers sulod sa lima ra ka duwa.
Sa pikas bahin, si Okoro adunay average nga 6.1 puntos ug 2.4 rebounds kada duwa sa miaging season. Nailhan sab siya nga kusog mo-depensa ug maayo mopusil gikan sa perimeter. / RSC