Nangabot na sa Dakbayan sa Mandaue ang kinatibuk-ang 271 ka ballot boxes, uban sa mga battery alang sa Automated Counting Machines (ACMs) samtang nangandam na ang Commission on Elections (Comelec) sa 2025 elections.
Ang mga ballot boxes gibiyahe gikan sa Comelec main office sa Manila ug naabot sa Mandaue niadtong Huwebes, Marso 20, 2025.
Ang ACMs nga maoy gamiton sa automated voting system, gipaabot nga ulhos-ulhos ang pag-abot sa unang semana sa Mayo, matod sa Comelec Mandaue Election Officer assistant Jacqueline Reuyan atol sa interview niadtong Huwebes Marso 20.
Tungod sa kakuwang sa lugar sa Comelec Mandaue office, ang mga opisyal nakahukom nga ang mga ballot box adto ipahimutang sa Mandaue City Hall grounds.
Ang lugar i-cordon aron way si bisan kinsa nga makapanghilabot ug masiguro ang kaluwasan niini.
Ang pagpanghatod sa ballot boxes sa nagkalainlaing presinto dungan nga himuon kon naa na ang ACMs.
Apan wala pay gitakda nga petsa kon kanus-a kini ipanghatod.
Ang ACMs direkta nga dawaton sa Comelec, samtang ang city treasurer’s office maoy responsable sa official ballots.
Ang Comelec padayon nga nanawat sa ubang mga election materials, nga naglakip sa thumbprint takers, secrecy folders, ballpens, appointment papers sa electoral board, ug envelopes alang sa election returns.
Ang testing ug sealing sa ACMs gitakda gikan sa Mayo 2 ngadto sa 7 sa mga gi-designate nga voting o polling centers.
Nahingpit na ang pagpangandam sa eleksyon ug gipasalig sa Comelec nga gisiguro sab nila ang security measures ug tanang election personnel napaubos sa training. / CAV