Nagpanikad ang batan-on ug wala’y pildeng si Christian Balunan sa pagpakigsangka sa usa sa iyang mga giidolong kababayan nga si kanhi two-time world champion Vic Saludar sa umaabot.
Mahitabo kini karong Hulyo 27, 2025 sa Seoul, South Korea diin magharong sila si Balunan ug Saludar alang sa International Boxing Federation (IBF) minimumweight title eliminator bout.
Sa interbyu sa SunStar Cebu, nagkanayon ang Sugboanong si Balunan nga grabe ang iyang kahinam ning awaya gumikan kay gawas nga makontra niya ang usa sa iyang mga idolo, mao kini ang taytayan aron makapanuktok na siya alang sa lehitimong world title.
Ang modaog ning awaya mao ang mahimong mandatory challenger sa laing Pinoy nga si IBF minimumweight champion Pedro Taduran.
Si Balunan, 25 anyos, adunay 12-0, 7 KOs nga rekord, samtang si Saludar naghupot og 26-6, 16KOs nga baraha. / EKA, ESL