Vendor naghigot sa iyang liog sa iyang paghikog tungod sa iyang pagduda nga ang iyang asawa ug ilang drayber adunay relasyon.
Ang biktima (ngan gipugngan ning mantalaan), taga Brgy. Mambaling, dakbayan sa Sugbo, napalgan sa iyang banay alas 6:30 sa gabii sa Lunes, Disyembre 4, 2023 nga nagbitay sulod sa pansayan sa ilang balay.
Sa ilang imbestigasyon, matod pa ni Police Major Jonathan Taneo, walay foul play ang kamatayon sa biktima.
Nasuta sa kapulisan nga nagselos ang bana sa ila ra usab nga drayber tungod sa pagtuo nga aduna kiniy relasyon sa iyang asawa.
Gikataho’ng ang magtiayon nagsige og away gumikan sa pangabubho sa bana.
Sa wala pa ang hitabo, matod ni Taneo nga nagkasinumbagay ang bana ug ang ilang drayber.
Gani nakaangkon og black eye ang bana, kinsa giingong nalupig sa sukmagay.
Nianang Lunes sa hapon nakigtagay siya og ilimnong makahubog ug nisaysay sa iyang problema ngadto sa iyang mga igsuon, dugang ni Taneo.
Giingong nipasidaan ang biktima nga mawala na siya sa Lunes hinungdan nga siya gitambagan sa iyang kabanay nga mokalma lang.
Nakugang na lang sila nga nagbitay siya sa pansayan nga wa nay kinabuhi.