Tungod lang sa pagduda nga dunay relasyon ang iyang asawa ug ang iyang silingan nga panday, bana namusil alas 11:45 sa buntag, Biyernes, Agusto 1, 2025 sa Sitio Proper, Barangay Bonbon, bukirang dapit sa Siyudad sa Sugbo.
Pulos samdan ang duha ka biktima. Ang mga biktima nga nakaangkon og mga samad pinusilan sa lawas mao silang Jerome Desaluna Ibarita, 40, taga Proper Bout, Barangay Bout ug Jurly Bacor Cabajar, 40, taga Sitio Gila-Gila, Barangay Bonbon.
Ang suspek nga padayong gawasnon human nakadagan agi sa sapa mao si Demetrio Batoon Martel, taga Sitio Kinyasan, Barangay Bonbon.
Matod ni Police Lieutenant Colonel Maria Theresa Macatangay deputy city director for operation sa Cebu City Police Office nga base sa imbestigasyon sa Malubog Police Station 12 nga nasuko ang suspek human makadungog og estorya nga ang iyang asawa ug si Jerome Ibarita dunay relasyon.
Matag panahon nga molakaw ang bana sa ilang balay molakaw usab ang iyang asawa ug magkita ang duha nga nakapasuko ni Demetrio.
Niadtong Biyernes sa buntag nakita sa suspek si Ibarita uban ni Cabajar nagbaktas gikan nga namanday, gisugat dayon ni sa suspek ug dayong pusil.
Naigo sa lawas si Ibarita apan ang bala nilapos kini ug niigo usab sa nag sunod nga kaubang panday nga si Cabajar. Human sa insidente sa pagpamusil nikaratil sa pagdagan si Demetrio agi sa sapa sa maong dapit samtang ang duha ka biktima gidala sa tambalanan nga padayon pa nga giatiman sa mga doctor.
