Bana ‘nalimot’, asawa gidunggab
SunStar Local News GPX

Bana ‘nalimot’, asawa gidunggab

Usa ka 72 anyos nga asawa gidunggab sa iyang 74 anyos nga bana sa Blk 6, Lot 12, Villa Lara Subdivision, Barangay Jubay, lungsod sa Liloan, alas 8:15 sa buntag, Huwebes, Abril 18, 2024.

Ang biktima mao si Carmelita Vabezas, samdam sa liog ug bukton human dunggaba sa iyahang bana gamit ang kitchen knife.

Samtang giposasan sa nires­ponding mga pulis mao si Sise­nado Donaldo Cabezas, kinsa giingong dunay gihambin nga sakit sa paghunahuna.

Si Major Eric Gingoyon, hepe sa Liloan Police Station nga nahinabi sa Superbalita Cebu, nagkanayon nga nakadawat silag tawag kabahin sa insidente nga dunay asawa nga nadunggaban sa bana nga gidali sa pagdala sa ospital sa dakbayan sa Danao.

Sa pag-abot sa kapulisan sa nahitaboan, napusasan ang bana ug nakuha ang kitchen knife nga maoy gigamit niini.

Matud ni Gingoyon, ang managtiayon nagkalalis samtang diha sa ilang panimalay ug giingong nalimot ang bana nga kutsilyo ang iyang nakuptan nga maoy gidunggab ngadto sa iyahang asawa.

Gibutyag sa mga anak nga ang ilang amahan daling masuko ug limtanon, sumala ni Gingoyon.

Dugang ni Gingoyon, luwas na ang kahimtang sa asawa ug nagawas na kini sa tambalanan.

Samtang, ang bana gibuhian sa kapulisan niadtong Huwebes, Abril 18, alas 3:00 sa hapon human ang mga anak ug asawa ningpadayag nga dili nila pasakaan og kaso kini.

Gipasaylo nila ang suspek tu­ngod sa gihambin niini. / GPL

Related Stories

No stories found.
SunStar Publishing Inc.
www.sunstar.com.ph