Bana nga nagtrabaho isip electrical maintenance nasakpan sa asawa ug kapulisan sa akto nga nagpatong pa sa usa ka babaye nga vendor sud sa lawak sa usa ka pension house sa dan Manalili, Brgy. Ermita, dakbayan sa Sugbo, alas 2 sa hapon sa Dominggo, Marso 10, 2024.
Ang lalaki mao si alyas Rene, 53, taga Basak San Nicolas, dakbayan sa Sugbo samtang ang iyang giingon nga kabit nga vendor giila sa alyas nga Elaine, 51, taga Brgy. Tunghaan, lungsod sa Minglanilla, minyo usab.
Unang nidangop sa Carbon Police Station ang asawa ni Rene nga si alyas Carmela, 57, kinsa nagpatabang sa kapulisan human niya makit-i nga nisulod ang iyang bana sa usa ka pension house uban sa usa ka babaye.
Tungod niini, giubanan siya sa mga personnel sa Women and Children Protection Desk.
Ila pang naabtan ang bana nga nagpatong kang Elaine, ang duha pulos hubo, sulod sa lawak sa pension house.
Nakahimo sila pag-abli sa pultahan pinaagi sa abag sa usa sa mga roomboy nga nagdala og yawe sa kwarto.
DI MAKAPASAYLO
Sigun sa asawa nga dili kini ang unang higayon nga nangabit ang iyang bana kay nahitabo na kini sa nanglabay nga katuigan, apan iya ra kini nga gipasaylo.
Apan ning tungora, dili na makapasaylo si Carmela, iya na kini nga tinud-on sa pagkiha sanglit dagko na man usab ang ilang mga anak.
Wala na mopasabot ang duha sa dihang gisuwayan sa pagkuha sa mga tigbalita ang ilang habig labot sa insidente.