Bana patay, misis angol

Gitabang sa mga rescuers ang magtiayon nga nag-motorsiklo nga naaksidente sa national hiway sa Barangay Binlod, lungsod sa Argao, alas 5:20 sa hapon, Dominggo, Disyembre 10, 2023, diin namatay ang bana nga nagmaneho sa motor.
Gitabang sa mga rescuers ang magtiayon nga nag-motorsiklo nga naaksidente sa national hiway sa Barangay Binlod, lungsod sa Argao, alas 5:20 sa hapon, Dominggo, Disyembre 10, 2023, diin namatay ang bana nga nagmaneho sa motor. Kapulisan sa Argao

Duha ka mga aksidente sa motorsiklo ang nahitabo sa habagatan sa Sugbo, Dominggo, Disyembre 10, 2023, usa ka namatay ug duha ang angol.

ARGAO

Usa ka magtiayon nga nagmotorsiklo naaksidente sa national highway sa Barangay Binlod, lungsod sa Argao, alas 5:20 sa hapon.

Ang bana nga nagmaneho sa motorsiklo nga si Patricio Tacoloy, 39, ug taga Brgy. Poblacion, lungsod sa Dumanjug, namatay human nakaangkon og dakong samad sa ulo.

Ang angkas niini nga iyang asawa nga si Adelaida Tacoloy, 43, ang naangol sa aksidente.

Sa pakighinabi sa Superbalita ni Helen Tacoloy, 52, maguwang sa namatay nga taga Sityo Ticoy sa Brgy. Bogo, Argao, niasoy kini nga ang iyang manghod uban sa iyang asawa gikan sa salosalo sa birthday sa iyang anak babaye.

Matod ni Helen, nakainom sa ilimnong makahubog ang iyang manghod nga nagmaniho sa iyang motorsiklo pauli sa ilang balay sa Poblacion, Dumanjug.

Apan nakurat na lang sila nga nadisgrasya diay ang iyang manghod uban sa asawa niini sa naasoy nga dapit human giingong nabangga sa mga bato dihang nag-ikis-ikis sa pagpadagan sa motorsiklo.

Ang magtiayon gidali sa pagtabang sa mga sakop sa Argao Municipal Disaster Risk Reduction and Management Office (MDRRMO) ngadto sa Bogo Argao District Hospital apan gideklarar ang bana nga dead on arrival.

DUMANJUG

Samtang, naangol ang nagmaneho sa motorsiklo nga si Jove Leal, 31, ulitawo, baker ug taga Kang-actol, Dumanjug,

Matod sa biktima nga gikahinabi sa Superbalita nga gikan siya sa lungsod sa Dalaguete ug mopadulong sa dakbayan sa Sugbo.

Sa pag-abot niya sa naasoy nga dapit duol sa Tulic Argao National High, alas 4:00 sa hapon, dunay iro nga kalit nitabok sa dalan hinungdan sa iyang daling pagprino apan nawad-an na hinuon siya sa balanse ug natumba.

Gidala siya sa sa Bogo Argao District Hospital ug luwas na ang kahimtang.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph