Bana sa prisuhan nagbag-ong tuig

Map of Pinamungajan, Cebu (Google maps)
Map of Pinamungajan, Cebu (Google maps)

Usa ka bana sa bilanggoan nagsaulog sa pagsugat sa Bag-ong Tuig dihang gidakop human dunggaba ang iyang asawa tungod sa selos.

Ang pagpanunggab nahitabo alas 11:00 sa gabii sa Sabado, Disyembre 30, 2023, sa Purok Rose, Brgy. Duangan, lungsod sa Pinamungajan.

Ang biktimang asawa usa ka 37 anyos ug ang suspek nga bana, 40 anyos, construction worker, mga molupyo sa ma­ong dapit.

Nasayran sa imbestigasyon sa kapulisan sa Pinamungajan ubos sa kamandoan sa ilang hepe nga si Police Maj. Gilfred Baroman nga selos ang hinungdan sa pagpanunggab subay sa asoy sa saksi nga anak babaye sa magtiayon.

Matod pa sa ilang anak nga 20 anyos nga dalaga nga siya ug ang iyang mama ang nisakay og motorsiklo aron sa pag-adto sa Pinamungajan Police Station aron sa pagsumbong ngadto sa kapulisan gumikan kay ang suspek nangisog.

Apan ang motorsiklo nga ilang gisakyan wa moandar busa ang drayber nikuha’g laing motorsiklo, samtang ang biktima nagpaabot didto sa daplin sa karsada.

Matod pa, ang suspek nga bana ang nahiabot nga nagdalag kutsilyo ug gidunggab ang biktima sa makaduha ka higayon.

Ang walang bukton sa biktima ang gipanagang sa maong dunggab hinungdan nga nakaangkon kini og lawom nga samad.

Ang biktimang gidala sa Pinamungajan District Hospital apan gibalhin kini sa usa ka ospital sa dakbayan sa Sugbo.

Samtang ang suspek nga bana gidakop sa kapulisan ug gibilanggo.

Dugang nasayran nga nagselos ang bana sa drayber sa motorsiklo.

Ang kapulisan nagdumili sa paghatag og pangan sa suspek ug biktima.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph