Banakon gibugno sa 3 ka iro, tipi

Banakon gibugno sa 3 ka iro, tipi
Hulagway gikan ni Jerry Alinsonorin

Patay ang usa ka king cobra o banakon human gitaba­ngan og bugno sa tulo ka mga iro sa Sityo Guindulman, Brgy. Patag, bukirang dapit sa dakbayan sa Naga, alas 10:00 sa buntag, Sabado, Pebrero 10, 2024.

Kini ang gibutyag ni Jerry Alinsonorin, ang nag-post sa hulagway sa banakon sa social media, nga gikahinabi sa Superbalita Cebu.

Matod niya nga nakurat ang kasilinganan tungod sa singgit sa kahadlok sa usa ka 15 anyos nga lalaki nga nagdagan gikan sa kalibunan, alas 10:00 sa buntag sa samang adlaw.

Matod pa, ang maong bata niadto sa kalibunan aron pagtubag sa sugo sa lawas apan namatikdan niya nga dunay nagkanaas sa iyang likod.

Sa paglingi sa bata, nakita niya ang ulo sa bitin nga milapad ug nituyhakaw hinungdan sa iyang kahadlok ug nagsinggit nga nagdagan.

Ang amahan sa bata daling nirespode dala ang iyang tulo ka mga iro aron pagpangita sa banakon. Ug dihang nakit-an, gitaba­ngan og bugno sa tulo ka mga iro ug namatay kini.

Kahinumdoman, sunodsunod na ang mga taho bahin sa pagkakita og banakon sa habagatan sa lalawigan gikan sa dakbayan sa Naga ngadto sa lungsod sa Argao.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph