Ulitawo naangol kay gipusil sa e-bike driver gumikan sa bangi sa “drugas” alas 3:00 sa hapon sa Lunes, Mayo 20, 2024 sa dalan Avocado, Brgy. Mambaling, Dakbayan sa Sugbo.
Si Jian Savellon, 33, ulitawo, nagpuyo sa nahisgutang lugar, nalandig sa Cebu City Medical Center human nakaangkon og daghang mga samad pinusilan sa kalawasan.
Wa na igkita human sa pagpamusil si Ramil Ortega, nagpuyo kanhi sa lugar.
Ang biktima nagpa-refill unta sa duha ka galon sa mineral water ug wala makabantay dihang niabot suspek nga nag-E bike dayon gipusil si Savellon sa makadaghang mga higayon.
Si Major John Lynbert Yangco nibutyag nga drugas ang motibo sa kremin human nasuta nga ang biktima ug suspek nagkabangi tungod sa bisyo sa ginadiling drugas.
Nasuta nila ni Major Yangco, nga ang suspek nagpuyo sa Mary Lou Savellon Compound sulod sa 20 ka tuig sanglit ang ginikanan niiini maoy caretaker.
Ang biktima pag-umangkon sa tag-iya sa compound ug niadtong Dominggo, Mayo 19, 2024 nipahawa ang suspek uban sa iyang pamilya human nga nadunggan ni Ortega nga nagyawyaw si Savellon nga nagkanayon: “Naa na ang animal!”
Nasakitan ang suspek kay nagtuo siya nga gipadungog sa biktima.
Gawas pa sab sa maong insedente, sa miaging buwan, nag-away sila si Ortega ug Savellon gumikan sa ilang mga bisyo. / GPL