Bangka nalunod tungod sa unos; 6 ka sakay luwas

Bangka nalunod tungod sa unos; 6 ka sakay luwas
■ NABIRA SA DAPLIN: Ang pumpboat nga nalunod apan wala hingpit naunlod sa kadagatan sa Brgy. Bahay, Lungsod sa Sibonga, habagatang Sugbo alas 7:30 sa gabii sa Huwebes, Hunyo 20, 2024, nabira daplin sa baybayon. / SIBONGA MDRRMO

Nakauli na sa ilaha sa Bohol nga luwas ang unom ka mga sakay sa pumboat nga naigo sa unos ug nalunod sa kadagatan sa Brgy. Bahay, Lungsod sa Sibonga, habagatang Sugbo alas 7:30 sa gabii sa Huwebes, Hunyo 20, 2024.

Base sa imbestigasyon sa kapulisan sa Sibonga Municipal Police Station ubos sa kamanduan sa ilang hepe nga si Police Capt. Fort Antony Valdez, nasayran sa Superbalita Cebu nga ang mga sakay sa pumboat usa ka pamilya nga gikan sa Mantatao , Calape, Bohol.

Kini giila nga sila si Federico Flores 72, minyo; Desiderio Flores, 42 , minyo; Devonne Flores, 15; Dereck Flores; Sarah Sacedon, 48, minyo; ug Atis Flores, 78, minyo.

Sila niasoy ngadto sa coast guard personnel nga sila niadto sa Sibonga niadtong Huwebes, Hunyo 20, 2024, aron pagtambong sa paghatod sa lubong sa usa nila ka sakop sa pamilya nga namatay.

Pagkahuman nibalik sila sa Man­tatao sakay gihapon sa pump­boat apan pag-abot sa la­wod sa Bahay, Sibonga sila nakasu­gat og unos nga nakamugna sa mga dagkong bawod nga niresulta sa pagkalunod sa ilang gisakyan.

Pagkahibawo sa Sibonga police, dali sila nga ning­porma og team nga gi lang­kuban sa Philippine Coast Guard sa Sibonga ug Municipal Disaster Risk Reduction and Managemeht Office aron ipahigayon ang rescue operation.

Apan alas 9:20 sa gabii sila gipahibawo nga ang tanang mga sakay naluwas ra sa ilaha nga kaliwat nga mga mananagat ug tua nakauli na sa Mantatao. / DVG

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph