Patay ang usa ka barangay kagawad samtang samdan ang usa ka polis human sila gibanhigan sa gituohang grupo sa Bangsamoro Islamic Freedom Fighters (BIFF) alas 3 sa hapon sa Dominggo, Marso 31, 2024, sa Maguindanao Del Sur.
Namatay giila nga si Barangay Kagawad Ansari Salim, 38, minyo, taga Barangay Pimbalakan, Mamasapano, Maguindanao Del Sur.
Angol sab sa hitabo si Police Staff Sergeant Mansor Sianga.
Sa report, si Maguindanao Del Sur Police Provincial Director Colonel Roel Sermese namahayag nga samtang sakay ang mga biktima sa usa ka D4D Toyota Hilux pick-up ug nagtadlas sa Sitio Dakumuya Brgy. Mamasapano sa lungsod sa Mamasapano, kalit sila nga girakrakan sa mga rebelde.
Dead on the spot ang barangay kagawad samtang si Sianga nga samaron daling giluwas sa mga saksi sa hitabo ug gidala sa ospital.
Sa wa pa ang ambush, ang grupo sa barangay kagawad gikan sa Barangay Tukanalipao ug mopauli na unta apan nahitabo ang insidente. / Superbalita Davao