Usa ka konsehal sa barangay ang samdan human napagan sa pagpamusil sa Purok Bayabas, Brgy. Poblacion, lungsod sa Compostela, alas 7:50 sa gabii, Sabado, Marso 23, 2024.
Ang biktima mao si Vicente Murillo, hamtong ang panuigon, minyo, barangay konsehal sa Magay, Compostela.
Sa pakighinabi sa Superbalita Cebu kang Police Capt. Lino Tryss Dacudao Galvan III sa Compostela Police Station, nasuta nga ang konsehal naigo sa liog.
Ang suspek sa pagpamusil usa ka babaye nga sakop sa first responder sa Brgy. Poblacion sa Compostela nga si Emily Duran Lerias, hamtong ang panuigon, dunay kapuyo ug molupyo sa dapit nga nahitaboan.
Matod sa polis, ang suspek nga si Lerias ug ang kapuyo niini nga si Jonathan Morales, nagkalalis.
Dugang pa, ang suspek niuli sa ilang balay ug nagkuha’g pusil nga gisud sa bag ug gibalikan ang iyang kapuyo.
Apan ang kapuyo nga nakamatikod nga pusil ang gidala sa suspek, nidagan kini maoy hinungdan nga wa maigo sa dihang gipusil kini sa suspek.
Ug ang si Murillo nga nagbarogbarog sa maong dapit, maoy naigo ug daling gidala sa tambalanan.
Ang suspek, matod ni Galvan, nihimakak nga siyay nakaigo sa konsehal apan daghang saksi nga nakakita nga nitumbok kaniya.
Hinuon, wa na ma-recover ang armas apan ang suspek gikatakda nga pasakaan og kasong frustrated murder. / DVG