Gisugyot ni Konsehal Nida Cabrera sa Barrio Luz, Dakbayan sa Sugbo nga ang mga barangay na ang modumala sa waste management sa ilang hurisdiksiyon.
Apan kinahanglan nga ang gobiyerno sa siyudad mogahin og pundo alang sa matag barangay.
Si Cabrera nga nahimong konsehal sa dakbayan niadtong 2010 hangtod sa 2016 niingon nga na sugdan na sa Cebu City ang "No Segregation, No Collection Policy" sa iyang panahon.
Sa tinguha karon nga dunay 10 ka barangay nga himuong pilot alang sa pagpatuman sa programa, si konsehal Cabrera niingon nga dili kini imposible nga mahitabo.
"Nasugdan na nato na (segregation) niadtong 2011 apan nahunong sa pagsira sa landfill niadtong 2015. I challenge the city to set aside funds for the barangays who will manage the waste collection," matod ni Cabrera.
Si Jean Carlo Generale sa City Environment and Natural Resources Office (Cenro) niingon nga nalatid sa Republic Act 9003 o ang Ecological Solid Waste Management Act of 2000 nga ang barangay ang modumala sa pagkolekta sa malata ug dili malata samtang ang siyudad sa residual ug sa special waste.
Sila si Cabrera ug Generale kauban sa ubang mga resource collector nitambong sa National Conference Transforming Waste Management: Community-based Solutions for a Sustainable Future nga gihimo sa Cagayan de Oro City, Abril 11, 2025.
Ang conference gipasiugdahan sa Eco-Waste Coalition nga maoy nagduma sa PHINLA Global Program.
Ang PHINLA (Phillipines Indonesia Sri Lanka) dunay upat ka project site sa Pilipinas ang Barangay Mintal sa Davao City, Gusa, Cagayan de Oro City, Bagong Silingan, Quezon City ug Inayawan, Cebu City.
Si Luz Mendoza, program director sa PHINLA 2 World Vision Development Foundation Inc., nagkanayon nga tumong sa ilang grupo ang pagtabang sa panginabuhi sa mga tigkolekta sa mga recyclable materials o resource collectors.
Ang PHINLA nagsugod niadtong 2019 ug matod ni Mendoza nilambo ang panginabuhi sa ilang mga resource collector.
Ang Cebu Inayawan Resource Collectors Association (CIRCA) mga kanhi manguykoyay og basura sa kanhi landfill sa Inayawan, apil sa nitambong sa conference. / VLM