Ang presidente sa Association of Barangay Captains (ABC) sa Mandaue City nagpahayag og kusganong suporta alang sa bag-ong aprubado nga Senate bill nga nagpalugway sa termino sa mga opisyal sa barangay ug mga miyembro sa Sangguniang Kabataan (SK) gikan sa tulo ngadto sa upat ka tuig.
Sa usa ka pahayag nga gipadala sa SunStar Cebu niadtong Huwebes, Enero 16, 2025, si ABC President Dante Borbajo nipadayag sa iyang suporta alang sa pagpalugway sa termino diin iyang gihatagan og gibug-aton ang mga hagit nga giatubang sa mga opisyal sa barangay sa pagpatuman sa long-term nga mga proyekto sulod sa tulo ka tuig nga termino.
“Sa akong napulo ka tuig nga serbisyo sa barangay, akong nakita ang kalisod sa limitadong panahon nga magamit alang sa pagpatuman sa mga proyekto, labi na sa mga dagkong inisyatiba,” matod ni Borbajo.
Si Borbajo nga mao usab ang barangay captain sa Barangay Canduman, niingon nga mubo ra ang tulo ka tuig nga termino og kasagaran moresulta sa dili mahuman o mapasagdan nga mga proyekto kon bag-ong administrasyon ang mopuli ug magdala og lahi nga mga plano.
Gipadayag usab ni Borbajo nga ang pagpalugway sa termino ngadto sa upat ka tuig positibo nga lakang aron masiguro nga mahuman ang mga inisyatiba sa barangay.
Ang balaudnon usab naglakip og probisyon nga walay opisyal sa barangay ang tugotan nga magsilbi og labaw sa tulo ka sunod-sunod nga termino sa parehas nga posisyon. / CAV