Dili na madayon ang Barangay ug Sangguniang Kabataan Elections (BSKE) karong Disyembre 2025.
Kini human gipirmahan ni Presidente Ferdinand “Bongbong” Marcos Jr. ang Republic Act (RA) No. 12232, usa ka balaod nga nag-postpone sa Disyembre 2025 nga BSKE ngadto sa unang Lunes sa Nobyembre 2026, samtang ang mosunod nga regular nga BSKE pagahimoon matag upat ka mga tuig gikan niini.
Ang termino sa katungdanan niadtong mapili sa Nobiyembre 2026 magsugod sa Disyembre 1 sa maong tuig.
Ang RA 12232 naghatag usab og probisyon nga ang termino sa katungdanan sa tanang napili nga mga opisyal sa barangay ug SK mahimong upat ka tuig imbes sa kaniadto nga tulo ka tuig.
Hinuon, ang kasamtangang mga opisyal sa barangay nga anaa na sa ilang ikatulong sunodsunod nga termino dili na makadangop alang sa samang posisyon sa Nobiyembre 2026 nga BSKE.
Ang bag-ong balaod nagmando usab nga walay napili nga opisyal sa barangay nga makaserbisyo og sobra sa tulo ka sunodsunod nga termino sa samang posisyon ug ang boluntaryong pagbiya sa katungdanan dili makaputol sa tibuok nga termino sa pagserbisyo sa usa ka napili nga opisyal.
Gipahayag usab niini nga ang kasamtangang mga opisyal sa barangay ug SK magpabilin sa ilang katungdanan hangtod nga mapili ang ilang mga puli, gawas kon matangtang o masuspende tungod sa usa ka rason.
Si Marcos sa sayo pa niingon nga iyang giaprubahan ang maong balaod aron ang Commission on Elections (Comelec) hingpit nga makatutok sa labing una nga Bangsamoro Autonomous Region in Muslim Mindanao (Barmm) parliamentary elections nga gikatakda sa Oktubre. / TPM / SunStar Philippines