Gideklarar sa doktor nga patay na dihang nidangat sa tambalanan ang barangay tanod sa Patupat, Lungsod sa Barili, Sugbo human gipusil sa iyang silingan.
Ang pagpamusil nahitabo sa alas 6:40 sa gabii sa Biyernes, Agusto 2, sa Barangay Patupat. Ang biktima giila nga si Palconaire Pasiluna, 43, minyo.
Samtang ang suspek giila nga si Renante Ewican, 55, minyo.
Base sa nahipos nga kasayuran sa Barili Municipal Police Station ubos sa pagdumala ni Police Captain Gerald Casalme nga nagkalalis ang biktima ug suspek niadtong tungora.
Sigun pa ni Ewican, kinsa nadakpan, nga ang iyang motorsiklo nga nakaparada sa maong dapit giingong gihilabtan ni Pasiluna, nga gi-’on’ niini ang ignition switch nga gikasuko sa suspek nga niresulta sa ilang panaglalis.
Misangpot sa pagpamusil ngadto sa maong tanod, gamit ang .357 Magnum revolver.
Si Pasiluna nakaangkon og samad pinusilan sa dughan nga milapos sa iyang buko-buko.
Samtang sa habig sa kabanay sa biktima, sila niingon nga nagkalalis kini ngadto sa suspek gumikan sa kasaba sa motorsiklo niini nga giparada nga nag-andar.
Nadala pa sa Barili District Hospital si Pasiluna apan nakabsan sa iyang kinabuhi. / DVG