Barbero giluya, gikawatan sa 2 ka mga sex worker
Tampo nga hulagway

Barbero giluya, gikawatan sa 2 ka mga sex worker

Barbero nga taga isla sa Camotes nagpatabang sa Waterfront Police Station human siya gikawatan sa duha ka commercial sex workers nga iyang gihilawas sa sulod sa usa ka lodge sa dalan Manalili, Barangay Sto. Niño, dakbayan sa Sugbo alas 4 sa kaadlawon sa Biyernes, Abril 5, 2024.

Ang biktima nga si Romnick (di tinuod niyang ngan), 28, nibutyag ngadto sa mga imbestigador sa Waterfront Police Station nga nag-inom sila kauban sa iyang mga ig-agaw sa usa ka imnan sa downtown area sa dakbayan sa Sugbo.

Sa dihang padung na sila nga manguli, siya giduol sa duha ka mga babaye ug gihaylo og lawasnong kalipay.

Sa dihang sila nagkasabot sa presyo, sila ningsulod sa usa ka lodging house sa Dan Manalili ug nagpatabang sa duha ka mga babaye ibabaw sa katre.

Apan human sa usa ka makutas nga round, gawas nga hubog pa, siya nakatulog ug sa iyang pag mata wala na ang duha ka mga babaye dungan sa pagkawala sa iyang kwarta, cellphone ug giapil pa ang iyang relo nga pinalit niya sa agi sa iyang pagpanupi.

Hubo na usab ang tanan niyang sapot, gani ang iyang brief didto na ilawom sa katre niya nakuha uban sa iyang pitaka.

“Gidala ko nila didto sa lodging house. Nakamatngon ko’g buot mga alas 4, nahuboan na ko. Hasta akong cellphone, kwarta nako wala na. Akong pitaka didto na sa ilawom sa katre, walay sulod,” asoy ni Romnick ngadto sa mga tigbalita dihang siya nidangop sa kapulisan.

Ang kapulisan sa Waterfront Police Station nakakuha nag kopya sa video sa CCTV sa gawas sa lodging house diin makita ug maklaro ang dagway sa duha ka mga babaye nga iyang kuyog sa pagsulod.

Usa sa mga imbestigador sa Waterfront Police Station nga dili lang magpaila nitug-an nga daghan na ang nabiktima niining mga commercial sex worker sa Dalan Colon, diin ang ilang kustomer ilang dalhon sa lodge ug kawatan kon makatulog na.

Tungod ani, magpatrolya sa kaadlawon ang kapulisan aron abugon ang maong mga babaye nga naa mag-estambay sa ngitngit nga dapit sa downtown area. / AYB

SunStar Publishing Inc.
www.sunstar.com.ph