Nihangyo si Cebu City Mayor-elect Nestor Archival sa Cebu City ngadto ni Cebu Governor-elect Pamela “Pam” Baricuatro nga pasuportahan nga mapadali ang paghuman sa Metro Cebu Expressway (MCE), usa ka dakong proyekto sa imprastraktura nga gitumong sa pagpahapsay sa suliran sa trapiko sa Metro Cebu.
“Ako siyang gihangyo nga ‘Gov, puwedi ba nga mag-join forces ta? Naa imong mga engineer, naa akong mga engineer. Unya, with the DPWH, mangita ta'g paagi nga madali because it will really help the traffic,’” matod pa ni Archival atol sa interbyu sa mga tigbalita human sa panumpa ni Baricuatro nga gipahigayon sa City Sports Club sa Cebu City niadtong Huwebes, Mayo 22, 2025.
Matod ni Archival, niuyon ang umaabot nga gobernador sa iyang hangyo.
Ang MCE usa ka gisugyot nga 73.7-kilometros nga highway nga gitumong sa pagsumpay sa Naga City, habagatang bahin sa Sugbo ngadto na sa Danao City sa amihanan nga maghatag og alternati-bong ruta.
Sa sayong bahin sa 2024, gimanduan ni outgoing Gov. Gwendolyn Garcia ang Department of Public Works and Highways nga temporaryo nga hunungon ang proyekto sa MCE tungod sa mga isyu sa kalikopan ug kaluwasan, ilabi na human sa mga pagdahili sa yuta ug pagkahugno sa pipila ka bahin nga walay environmental compliance certificate.
Isip resulta niini nga mga babag ug pagkalangay, opisyal nga gitangtang sa DPWH ang MCE gikan sa lista niini sa Priority Infrastructure Flagship Programs nga naghatag og dalan alang sa Kagamhanang Probinsiyal nga manguna sa proyekto ubos sa public-private partnership.
Aron mapadali ang pagpalambo, ang Kapitolyo nagtukod og technical working group ug nakig-partner sa mga pribadong kompanya, lakip na ang Acciona Infrastructure sa Spain ug Taisei Corp. sa Japan, aron sa pagtimbang-timbang sa financial viability sa proyekto ug pagpadali sa pagkumpleto niini.
Niadtong Pebrero 10, gipahigayon ni Garcia ang usa ka tigom uban sa Acciona Infrastructure ug Taisei, local government units, ug national agencies aron sa pagkumpleto sa expressway.
Sa laing bahin, si Baricuatro nanawagan og transparecy sa pagtuki sa P1.2 bilyunes nga supplemental budget alang sa Kagamhanang Probinsiyal.
Apan wala mapalabang ang maong pundo sa dihang wala ma-quorum ang mga sakop sa Hunta Probinsyal.
Lima lamang sa 18 ka mga sakop sa hunta ang nitambong sa special session nga gipahigayon niadtong Miyerkules, Mayo 21.
“Speechless ko da, kay we know that there was not a quorum,” matod pa ni Baricuatro.
Nagpadayag ang gobernador-elect og paglaum nga masulbad ang maong butang inig balik sa hunta alang sa regular nga sesyon niini karong Lunes, Mayo 26.
“I’m sure our board members are responsible public servants. [They] will not do anything to jeopardize our incoming administration,” dugang niya.
Samtang gipasaligan sab ni Baricuatro ang mga empleyado sa Kapitolyo nga walay mass layoff ubos sa iyang administrasyon.
“We don’t need to take everybody out… We’ll evaluate properly who stays,” sumala pa niya. / ANV