NAKIGTAGBO si Cebu Governor- elect Pamela Baricuatro ni outgoing Cebu Vice Governor Hilario Davide III aron mangunsulta sa dugang programa ug kalambuan nga angayang ipatuman sa Lalawigan sa Sugbo.
Si Baricuatro nikortesiya sa buhatan ni Davide sa buntag sa Hunyo 25, 2025.
Iyang gipasalamatan si Davide sa pag-awhag sa sakop sa hunta probinsyal nga suportahan ang bag-ong pamunoan, atol sa katapusang session sa Sangguniang Panlalawigan niadtong Hunyo 23.
“There has to be a good collaboration gyud between the legislative and executive so I hope I will be able to accomplish that relationship you had,” matod ni Baricuatro.
Sa laing bahin, subling gipahibalo ni Baricuatro nga dili gyud mo-cooperate ang team ni outgoing Cebu Governor Gwendolyn Garcia sa ilang transition team.
Siya nipahibalo nga wala pa makadawat ang iyang team sa mga dokumento nga gikinahanglan alang sa pormal nga pag-transition sa opisina ni Garcia.
“This is to inform the public that until now, wala pay formal nga turnover of records sa Transition Team ni GPB (Governor Pamela Baricuatro) from the office of the outgoing Governor,” post ni Baricuatro sa social media. / ANV