Di makatambong si Gobernador Pamela Baricuatro sa umaabot nga State of the Nation Address (SONA) ni Presidente Ferdinand “Bongbong” Marcos Jr. tungod sa daghan niyang gimbuhaton sa Probinsya sa Sugbo.
“I wish, I want to, but yeah we are invited, all governors are, but we have a lot of work to do,” matod ni Baricuatro ngadto sa mga reporter sa live press conference niadtong Miyerkules, July 23, 2025.
“As we know, wala mi-transition. So everyday here is really a working day, 12 hours to 16 hours, so I wish I can go,” dugang niya.
Sa buwag nga interview niadtong Biyernes, July 25, si Cebu Provincial Agriculture Planning Head Jerome Mabag nanghinaot nga duna siyay madungog nga suporta sa agrikultura atol sa SONA.
“Basically, sa agriculture side, I want to hear about the agricultural inputs para sa atong mga mag-uuma—first, our insurance for each of their livelihoods,” matod ni Mabag.
Iyang gitataw ang panginahanglan sa mga farm machinery ug post-harvest facilities nga makatabang sa pagkunhod sa production costs.
“If their expenses are low, our farmers will earn more,” matod niya.
Gibutyag ni Mabag nga ang probinsya padayong mopatuman sa agri-fisheries insurance programs, pagpalambo sa countryside development initiatives, ug mosugyot og dugang post-harvest ug production support facilities.
Matod niya nga dunay mga ongoing proposals nga padayon gi-review sa kasamtangang administrasyon aron pagkonektar sa mga mag-uuma ngadto sa mga industrial buyers aron pagseguro nga dunay mopalit sa ilang mga produkto.
“Lisod kaayo magtanom kung walay buyers ,” matod ni Mabag . / CDF