Gimanduan ni Gobernador Pamela Baricuatro ang mga lokalidad sa Probinsiya sa Sugbo nga ipatuman ang Freedom of Information (FOI) mechanisms sa ilang tagsa-tagsa ka lugar.
Kini pinasubay sa lagda ubos sa Executive Order No. 43, S. 2026 ni Baricuatro nga nagmando sa pagpatuman sa FOI sa mga buhatan sa lalawigan subay sa “constitutional right to information” sa publiko.
Ubos sa Section 4 sa maong lagda, gisaysay nga dili na kinahanglang huwaton pa nga adunay indibidwal nga mo-request sa impormasyon, tungod kay ang mga lokalidad gidasig sa pagbutang niini sa ilang official websites, social media accounts, bulletin boards, transparency portals, ug uban pang platforms.
Naglakip kini sa mga impormasyon may kalabutan sa financial reports, procurement plans ug contracts, development plans ug programs, annual reports, ug mga report sa mga proyekto, programa, kalihukan ug uban pa pinasubay sa mga limitasyon niini.
Gimanduan sab ang tanang sakop sa Provincial Information Office nga mohatag og technical assistance sa mga lokalidad sa pag-establisar ug pagpatuman sa ilang FOI programs, lakip ang pagpakig-alayon sa mga may kalabutan nga opisina.
Subay niini, giawhag ang tanang lungsod ug siyudad sa probinsiya nga mopatuman sa maong mando pinaagi sa paghimo og kaugalingong ordinansa alang niini. / ANV
