Bukas si Governor-elect Pamela Baricuatro sa pagpakig-alyansa sa mga sakop sa Cebu Provincial Board nga gidominar sa kaatbang nga grupo alang sa mas maayo nga pang gobiyerno.
Susamang baruganan ang gipadayag ni Vice Governor-elect Glenn Soco.
Si Soco mao ang running-mate sa naparot nga kandidato pagka gobernador sa One Cebu Party nga si Gobernador Gwendolyn Garcia.
Si Baricuatro usa ka bageto sa politika ang nipukan sa gihulagway nga higante nga si Garcia sa Mayo 12, 2025, National ug Local Elections.
Human sa iniphanay sa mga balota, si Baricuatro nakakuha og 1,107,924 votes nga nilabaw og 340,000 votes sa nakuha ni Garcia nga 765,051 votes ug sobra sa usa ka milyon nga diperensiya batok sa independenteng kandidato nga si Valeriano Gingco nga 33,583 votes.
Ang bag-ong napili nga gobernador mag-atubang og dakong hagit sa pagpatuman sa iyang mga programa tungod kay moagi pa man kini sa mga sakop sa legislative body nga gidominar sa iyang karibal.
Manumpa siya isip bag-ong gobernador sa lalawigan sa udto sa Hunyo 30.
Makigtambayayong
Sa usa ka pamahayag nga gipadala ni Baricuatro sa SunStar Cebu Miyerkules, Mayo 14, kini nagkanayon nga ang pagpakigtambayayong sa mga sakop sa Hunta Probinsyal nga pangulohan sa Bise Gobernador maoy epiktibong paagi aron makab-ot ang kalampusan.
Pinaagi sa pagpakigtambayayong mahatagan og prayoridad ang kaayuhan sa mga Sugbuanon subay sa gihan-ay nga programa sa administrasyon ni Baricuatro.
Iyang gitataw nga ang mandato ug gahom nga iyang huptan gikan sa mga Sugbuanon nga nipili kaniya ug iyang giangkon nga menos pa siya og kasinatian sa pagpadagan sa gobiyerno itandi sa mga tang-an na nga mga board member.
Sa posibilidad nga dunay motumaw nga panagsungi sa mga programa sa higayon nga hashasan kini sa provincial board, si Baricuatro nipasabot nga kon nasubay kini sa iyang plano, wala siyay nakitang problema.
“There will be friendly ways because again governance has to be collaborative. I’m sure that they, the seasoned PBs that they are, know that as government workers and Public servants, we are responsible and accountable to deliver as swiftly and as efficiently, the services to our constituents,” matod ni Baricuatro.
Si Soco sa iyang bahin, nahatagan og bag-ong mandato human siya mosilbe isip Provincial Board Member sa ikapitong distrito sa Sugbo ug siya na ang presiding officer sa umaabot nga Sanggunian Panlalawigan.
Matod niya nga mahimo siyang motrabaho ni bisan kinsa basta alang sa kaayuhan sa Lalawigan sa Sugbo.
Gustong mapadayon ni Soco ang nag-ung-ong nga infrastructure projects nga naglakip sa Metro Cebu Expressway ug ang Mactan-Cebu Fourth Bridge ug pagduso sa pagpangita og daghang trabaho , economic expansion, ug pagtabang sa mga Small and Medium Enterprises.
Iduso sab niya ang pagpadayon sa mga programa sama sa Sugbo Negosyo ug uban pa. / EHP