Otsenta milyunes pesos ang daling ipagawas sa kagamhanan sa alang sa 16 ka ospital sa tibuok Lalawigan sa Sugbo.
Kini nga lakang gihisgutan atol sa usa ka tigom sa Kapitolyo niadtong Miyerkules, Hulyo 2, 2025.
Sa usa ka interbyu, gibutyag ni Provincial Administrator Ace Durano ang dinalian nga plano sa pag-apudapod og P5 milyunes sa matag usa sa 12 ka district ug upat ka provincial hospitals nga moabot og P80 milyunes.
Matod niya nga si Gobernador Pamela Baricuatro nakapagawas na og memorandum alang sa dali nga pagpagawas sa maong pundo nga gitinguha nga mahitabo sa sunod semana.
Kini aron matubag ang mga kinahanglanon nga tambal ug ekipo.
Dihang gipangutana kon nganong wala napagawas sa miaging administrasyon ang maong pundo, nagdumili si Durano sa pagtubag.
Gipaniguro niya nga kon ang P5 milyunes dili igo sa nahibilin nga lima ka bulan sa tuig, ang kagamhanan andam nga magdugang og pundo.
Gibutyag ni Durano ang mga plano sa pag-upgrade sa kasamtangang mga hospital ug ang mga Level 1 hospital himuong Level 2 nga facility ug ang mga infirmary nga kasamtangang naghatag lang og batakang serbisyo sa panglawas apan walay batakang operasyon, himuong Level 1 nga hospital.
Matod ni Durano nga ang long-term vision naglakip sa pagbag-o sa mga Level 2 hospital ngadto sa mga apex hospital, tumong nga i-decentralize ang specialized medical care nga kasamtangang nakapundo sa Vicente Sotto Memorial Medical Center, ang bugtong apex hospital sa Sugbo.
“Ma-spread na gyud siya, dili na kinahanglan moanhi sa Vicente Sotto,” matod ni Durano.
Mahitungod sa mga kawani sa ospital, gipahibalo niya nga ang Department of Health (DOH) nisugyot sa pagdugang sa mga bakanteng plantilla positions aron matuman ang mga rekisitos alang sa Level 1 hospital accreditation nga padayong gitun-an. / ANV