Migahin og usa ka semana nga pagbisita sa Manila si Cebu governor-elect Pamela “Pam” Baricuatro aron makigtagbo sa mga opisyales sa nasud ug mga negosyante aron maseguro ang suporta alang sa mga prayoridad sa kalamboan sa Sugbo.
Sa iyang Facebook post niadtong Sabado, Hunyo 7, 2025, gipaambit ni Baricuatro ang mga highlight sa iyang biyahe nga nagtutok sa pagtukod og relasyon pinaagi sa sunod-sunod nga mga tigum ug pakiglambigit.
Matod niya, ang kusog sa Sugbo isip “pinakadato nga probinsya” kinahanglan nga dili mosangpot sa pagka-himulag niini, “We need help, and we must reach out to the national and international community.”
Nagsugod ang iyang pagbisita sa usa ka tigum uban sa mga sakop sa diplomatic community sa Forbes Park sa Makati City, nga nagpasiugda sa mga paningkamot sa pagpalapad sa pakigtambayayong sa Sugbo sa global community.
Gibisita usab niya ang mga buhatan sa pipila ka mga senador sa ikaduhang adlaw, diin gikataho nga nakadawat siya og mga pasalig sa suporta alang sa mga inisyatibo sa panglawas sa Sugbo sa iyang pag-bisita ni Sen. Bong Go.
Si kanhi Presidente Gloria Macapagal-Arroyo maoy nag-abi-abi kaniya alang sa paniudto sa sunod nga adlaw sa pinuy-anan niini sa Forbes Park, diin gipaambit sa kanhi pangulo ang pamaagi sa pagdumala.
Pagkahuman, nakigtagbo siya sa negosyante nga si AJ Violago ug philanthropist nga si Dame Mariquita Yeung aron hisgutan ang posibleng mga programa sa edukasyon alang sa probinsya.
Ang dugang nga mga tigum naglakip sa mga diskusyon uban sa mga opisyal sa World Bank mahitungod sa Bus Rapid Transit (BRT).
Matod ni Baricuatro, ang diskusyon nagpadayag usab bahin sa mga programa nga ma-access sa Sugbo pinaagi sa mga nasudnong ahensya uban sa World Bank.
Nakig-istorya usab siya sa mga opisyal gikan sa U.S. Embassy ug uban pang mga ahensya sa gobyerno aron pagsuhid sa mga paagi sa kooperasyon.
Sa iyang ikalimang adlaw, nakigtagbo siya sa mayor sa Baguio City nga si Benjamin Magalong ug Isko Moreno sa Manila City, diin iyang gihulagway ang duha ka opisyal nga “Role Models for Good Governance and Effective Leadership.”
Nakigtagbo usab siya sa ubang mga sakop sa Partido Demokratikong Pilipino (PDP) Laban, lakip na si kanhi energy secretary Al Cusi kauban ang mga sakop sa partido nga sila Astra Pimentel ug Coco Naik Pimentel.
Sa ikaunom nga adlaw, nakigtagbo siya sa business sector alang sa umaabot nga mga kolaborasyon.
“We must continue to reach out, collaborate, and grow—Cebu’s best days are ahead, and we will be part of shaping that future,” matud niya.
Ang maong adlaw naglakip sa briefing gikan sa iyang mga abogado mahitungod sa election protest ni outgoing Cebu Governor Gwendolyn Garcia batok kaniya.
Matod ni Baricuatro nga bililhon ang iyang pag-biyahe alang sa kaayohan sa mga Sugbuanon.
Gipadayag niya nga ang mga koneksyon ug mga panabut nga nakuha sa iyang pagbisita magpadayon sa mga programa sa Sugbo.
Sa 2025 National ug Local Election, si Baricuatro nanguna batok ni Gobernador Gwendolyn Garcia sa kapin sa 300,000 ka boto.
Si Garcia nakakuha lang og 765,051 ka boto batok sa 1,107,924 ni Baricuatro.
Apan, si Garcia, nangangkon nga migawas ang teknikal ug software-based nga ebidensya nga nagsugyot nga ang mga boto para unta kaniya narehistro kang Gobernador-elect. / EHP